«Слово» – 3-тя неділя по Сошетствії Святого Духа – неділя, 9.00 год.

В днешнім євангелію нам Господь Ісус Хрістос подавать практічны порады в одношіню ку вонкашньому світу. Наперед говорить о потребі мати здравы очі. Кідь мать чоловік проблем з очами, тогды ся намагать, жебы перекрыти тот недостаток через іншы орґаны тіла: рукы, ногы, уха. Но цалком то зробити не може. Но Ісус ту говорить о чімсь глубшім, говорить о внутрішніх очах душы. Кідь маме тот погляд здравый, тогды знаме выбрати собі, што є про нас пріорітов, што є потрібне і што нам приношать хосен. Тогды чоловік не поставить на місце Бога служіня мамоні, але і стараня о матеріялны добра звірить до рук тому, котрый старать ся о небесны пташата ці польовы травы. Дух тото світа хоче лем єдно – затемнити наш внутрішній зрак, жебы не видіти потребы душы, забыти, же ту на земли мы не вічно, лем до часу. Жебы забыти на свою бессмертну душу. Кідь ся то подарить, тогды чоловік обзерать ся лем за земным, хоче все веце, без огляду на средства, выберать лем дочасне роскоші, і так понарять ся глубше до рабства діавола. Прото Ісус на закончіня днешнього євангелія говорить: Наперед глядайте Царьство небесне і його справедливость а тото (што є потребне про земный жывот – облечіня, їдло) вам буде додане. Буде на своїм місці. Слава Ісусу Хрісту

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА