«Слово» – 28- ма неділя по Сошетствії Святого Духа – неділя, 9.00 год.

Євангеліє днешньой неділі росповідать о події выздравліня десятьох людей, котры были хворы на лепру.

Хворота, котра выключала чоловіка із співжытя з іншыма. Тіло загнивало і одпадовало. Невыносный смрід із вонка і з внутра. А такыма были і хворы із днешнього Євангелія. А они чують: Є надія на выздравліня. Є даякый чоловік, што докаже освободити. Може чули од іншых выздравленых і в їх сердцях завітило світло надії. Кідь видять Ісуса переходити коло них схоснують принагоду і стоячі надалеко кричать: Ісусе, Учітелю, помилуй нас! Ісус їх посылать ку священикам, котры мали ствердити выздравліня. А они увірили, і йдуть по дорозі, спознавають, же суть здравы. Єден із них ся вертать подяковати Ісусови. Быв то Самаріян. Ісус ся звідує: Де є тых девять? Лем єден пішов і прославляв Бога.

Ісус нас учіть днешнім словом вдячности. Бог нам дає великы дары. Св. Василій говорить, же не мож їх зраховати. Вшытко сотворіня было сотворене про нас. Кажда сотворена рослинка своїм єствованьом голосить славу Сотворителя. І кідь посмотриме і на наш жывот, кілько сьме прияли од Господа, не забывайме на то. А што вшытко іщі мать про нас приготовлене. Як апостол Павел учіть: Людьске око не виділо і ухо не чуло, што Бог приготовив про тых, котры Його люблять. А окрім того кілько раз нас Господь освободив і од той духовной лепры, нашых гріхів. І робить то все, кідь ку Ньому приходиме із щіростьов сердця і просиме о одпусщіня. І нам говорить як тому чолововіку: Тебе сохранила твоя віра. Ідь а уж, не гріш веце! Прото не будьме невдячны ку так Великому Добротвортельови, котрый нас так любить. Котрый хоче про нас лем тото найліпше. Котрый нам дає щіры дары уж ту на земли а хоче нам подати і дары небесны у вічности. Но притім решпектує нашу свободну волю. Прославляйме Його каждый день за його доброту, за Його дары, за правдиву свободу, за одпущіня гріхів, не лем нашыма словами, але і нашыма ділами, цілым нашым жывотом. Слава Ісусу Хрісту!

В неділю, 17. децембра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. децембра о 15.00, 20.00 год. і 18. децембра o 2.00 год. за русиньскым часом.

Фото: Лепрозорія. Жрідло: Wikipedia.