«Слово» – 27-ма неділя по Сошествії Святого Духа – неділя, 9.00 год.

Ісус Хрістос приходить до сінаґоґы. Там увидів жену, котра мала духа слабости – была згорблена і не могла ся напростити. Закликав єй і повів: Жено, ты ослободжена од свойой хвороты. І она такой ся напростила і прославляла Бога.

Началник сінаґоґы розъїв ся, кедь то увидів і вызвав людей, жебы приходили і дали ся лічіти мімо дня суботы. Тым обвинив тоту жену, но она не просила о выздравліня. Ісус сам закликав і выздравив. Прото непрямо тот началник сінаґоґы обвинює самого Хріста. Но Ісус йому одповів: Фалшивый чоловіче – ці каждый із вас не одвязує вола або осла, і не іде го напоїти і в день суботній? А тоту жену, котра была звязана сатаном вісемнадцять років – не мала быти выздравлена в день суботній? Тогды вшыткы, што были проти нього, ся заганьбили. А народ Його прославяв.

Тото слово указує на велику любов Хріста. Ісус увидів тоту жену. Многы єй виділи, но смотрили на ню з погорджіньом. Она была згорблена, не могла видіти ани самого Хріста. Смотрила лем долов. Ісус словом жена привертать єй достнойность чоловіка. Своїм словом – жено, ты ослободжена – їй привертать здравя.

Так Ісус кличе і нас. Гріх і страсти роблять душу згорбленов. Она тогды смотрить лем долов, не смотрить горі – то є на вічность, на небо. Думать лем на земне. Жыє лем про тоту землю. Ісус кличе: Подьте ку мі. А реакція чоловіка може быти двояка. Або як тота жена, котра прияла позваня Ісуса і была виздравлена, або як начальник сінаґоґы, котрый ся выгваряв на день суботній.

Так ся чоловік выгварять – ту на молодость, ту на роботу, ту на карьєру, або хоцьяку іншу причіну. Ісус кличе, но лем до часу. Што собі чоловік выбере, тото буде мати цілу вічность. Або вічне щастя, або вічне проклятя. Довольме Хрістови, жебы напростив нашу душу од згорблености гріха і страстей ту на зенлі, жебы не была згорблена цілу вічность Слава Ісусу Хрісту!

В неділю, 13. децембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 13. децембра о 12.00 год. і 14. децембра о 2.00 год. за русиньскым часом.