«Слово» – 26-та неділя по Сошествії Святого Духа – неділя, 9.00 год.

Днешній образный приклад о чоловікови, котрому поле щіро зародило, нам приношать великый духовный хосен. Ісус Хрістос указує чоловіка, котрому його поля обіцяли велике богатство.

Іщі нич із того не мав дома. Але у своїй фантазії уж роздумує так: што буду робити? Не мам… Але тоты його слова бы скорше одповідали бідному: што буду робити? Не мам што їсти, што пити, де схылити свою глову… А тому звістовали, же на полях є того много, а то обіцять велике богатство. А він реаґує подобно бідакови.

Но може і не хотячі повів правду: Не мам… Бо справды не мав. Він ся не намагав при роботі на полях, але земля сама із Божой благодати выдала свої плоды. Вшытко належало Господу, він быв лем справця того маєтку.

Апостол Павел нас учіть, же мы нич не принесли на світ, а нич собі не однесеме. Подобно і праведный Йов, котрый мав много земного богатства, но жыв як бы не мав. Чом? Бо собі усвідомльовав, же вшытко належыть Богу. А кедь о тото вшытко пришов, што можеме видіти в книзі Йова, він додав: Господь дав, Господь взяв, най буде імя Господа благословлене.

Тот чоловік мав повісти: Слава Богу за його дары. То лем із його доброты мам тото вшытко. А што буду робити: буду складати тоты Божы дары до сыпанців – потребуючіх. Но він не так: нНе мам де дати своє богатство. Прото збурям свої сыпанці а поставлю векшы, а там зложу своє богатство

Як часто хоснує тото словко: своє. А так указує, же думать лем на себе, а з никым другым ся ділити не буде. Потім повім душі: Маш маєтку на многы рокы, їдж, пий, весель ся.

Посмотьме, до чого дішов! Тото што приналежыть тілу, він признавать душі! Душа не потребує їсти або пити, но тіло. Так указує, же він не думав ани на Бога, ани на то, же мать безсмертну душу. А раз буде давати одповідь зо свойого жывота.

Бог проговорив через голос совісти ку його душі: Нерозумный! Іщі той ночі пожадають од тебе твою душу, а кого буде тото, што ты набыв? Він собі обіцять безстаростный довгый жывот а смерть уж є близко. Наперед украв то, што належыть Богу, а потім украв і рішіня о довжці жывота. Нато чує Боже рішіня: Іщі той ночі… А Ісус закончує: Так буде з каждым, хто богатне перед собов, а не є богатый перед Богом.

Тото слово нам говорить: Не богатний перед собов, перед тым світом або подля учіня того світа, але перед Богом. А Як? Памятати, же вшытко є од Бога, а мы сьме лем справцями. І того, што нам є звірене, раз будеме давати одповідность.

Богатнийме прото на добры діла, на тверду віру в Боже слово. На надію, на щіру любов ку Богу і ближньому. Слава Ісусу Хрісту!

В неділю, 3. децембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 3. децембра 2023 р. о 12.00 год. і 4. децембра 2023 р. о 2.00 год. за русиньскым часом.