«Слово» – 26-та неділя по Сошествії Святого Духа – неділя, 9.00 год.

Ісус Хрістос нам в днешнім слові подавать хосенный образный приклад. Говорить о чоловікови, котрому поле щіро зародило.

А тот чоловік намісто того, жебы подяковав Господу Богу, же без його мозоліня, го Господь поблагословив, він роздумує, што буде робити. Не знать, де поскладати ціле тото богатство, бо його сыпанці суть прималы помістити тото вшытко.

Іщі было вшытко на полі. Іщі могла прийти буря, град, вшытко зничіти, він намісто прославы Бога і просьбы о щастливе завершіня позбераня того вшыткого, роздумує так: Збурям сыпанці і збудую векшы. Там дам вшытко. Думать лем на себе. Видить лем себе. А потім іде іщі гірше до глубкы зла і говорить: Потім повім душі, маш маєтку на многы рокы, їдж, пий, весель ся.

Доходить до того, же собі обіцять довгый жывот. Не думать на смерть на вічность. А Бог йому повів: Нерозумный, днесь в ночі выжадають собі, выторгнуть твою душу.

Тото ся діє з чоловіком, котрый забыв на Бога, думав лем на себе. Забыв і на ближнього. Лем сам хоче годовати роками з того богатства і ставлять ся до позіції пана жывота. Хоче рішати о довжці жывота.

Про нас є тот приклад поучный і хосенный, жебы не брати собі приклад з того чоловіка. Але за вшытко дяковати, што приймаме од Господа, выхосновати на Божу славу, на служіня любви нашым ближнім. Жебы і нам не чути раз слова: Нерозумный… Слава Ісусу Хрісту!

В неділю, 19. децембра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 19. децембра о 12.00 год. і 20. децембра о 2.00 год. за русиньскым часом.