«Слово» – 26-та неділя по Сошествії Святого Духа – неділя, 9.00 год.

Даякому богатому чоловікови поле добрі зародило. Він ся замдумує у своїм внутрі: што робити, де поскладати ціле тото богаство. Хоче збуряти свої сыпанці і поставити векшы.

А потім як то буде зроблено, повість своїй душі: їдж, пий, весель ся, маш маєтку на много років. Но Бог такому повість: Іщі той ночі твою душу заберуть, а кому буде належати тото, штось надобыв? Ісус закончує тот образный приклад словами: Так буде з тым, хто богатне перед собов, а не є богатый перед Богом.

Тот богатый чоловік забыв, же не своїм мозоліньом він надобыв тото вшытко, але із Божой доброты. Іщі ани не мав вшытко під стріхов а уж роздумовав, што буде з тым робити. А наконець говорить своїй душі: їдж, пий.. тото, што належыть тілу. Тот чоловік забыв на Бога, не дяковав Богу за тоты дары, приписовав вшытко собі. Його погляд быв напряменый лем ку земному, цалком быв засліпленый плеонексіов – слово, котре означує жадобу мати веце, ненасытне хотіня. А тым, же мав того много, обіцяв собі і довгый жывот. Ісус нас тыма словами учіть, же хоць кілько бы мав чоловік маєтку, довжка його жывота, не є залежна од маєтку, але од Бога. Він быв богатый перед собов. Перед Богом быв бідаком. Бо нич із того не міг взяти зо собов.

Прото нам днешнє слово говорить о великости дару жывота, і як є потрібно выхосновати каждый день, жебы богатнути перед Богом. Як то але робити. Так, же будеме творити добро. Не рпо людьске око, жебы нас виділи, ани про даякы выгоды, але на Божу славу. Тото є правдиве богаство, котре піде з нами і через ворота смерти. На тото памятайме а старйме ся так богатнути, жебы раз нечути слова, котры чув тот нерозумный чоловік. Слава Ісусу Хрісту!