«Слово» – 23-тя неділя по Сошествії Святого Духа – неділя, 9.00 год.

В днешнім слові євангелія нам євангелиста Лука указує як Ісус Хрістос зо своїма учениками приходить до Ґадариньского краю. Там їх стрітив чоловік, овладнутый демонами.

Його перша реакція на притомность Ісуса: Што тя до мене? Прошу тя, не муч мене. Што тото значіть? Ісус указує своє божество. Йому є вшытко підряджене. І тот овладнутый демонами другым людям наганяв страх. Но як Ісус приходить, є у великім страху. Просить собі хоць лем доволіня іти до стада свинь. Ісус доволює, не зато, жебы по волі демонам. Но зато, жебы указати їх злобу. А тыж і то, же без Божого доволіня не можуть войти ани до свинь.

Кедь народ потім вышов ку ньому, виділи, же тот чоловік є при розумі і облеченый коло ніг Ісуса. Они його просять, жебы одышов із їх края. А Ісус насів до лодькы і одышов. Ісус їм пришов указати, же приношать слободу. Они ся бояли, же зазнають іщі векшу страту, кідь Ісус там побуде довгше. Тото слово і нас учіть, же кідь сьме з Ісусом, не мусиме ся бояти силы злого. Але то выжадує од нас одповідь – охабити старый способ жывота, а зачати новый жывот. Выжадує жертву, смерть старого чоловіка. Така наша одповідь приношать до сердця покій і радость, котру давать Бог тым, што го люблять. Прото най наша реакція не буде така, як тых людей: Ідь од нас! Але кличме з тым выздравленым: хочеме быти з Тобов. Слава Ісусу Хрісту!

В неділю, 15. новембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. новембра о 12.00 год. і 16. новембра о 2.00 год. за русиньскым часом.