«Слово» – 20-та неділя по Сошетствії Святого Духа, Апостол Тома – неділя, 9.00 год.

Святый апостол Тома – єден із дванацятьох апостолів, походив із Ґалілеї. Кідь Господь наш Ісус Хрістос зачав свою проповідь євангелія, увірив і Тома і быв зачісленый ку апостолам.

Тома вірно перебывав з Господом, быв свідком його чудесных діл, чув його спасительны слова. По Хрістовых страстях не быв там, кідь ся Ісус появив ученикам через заперты двері. Кідь му то оголосили, Тома не хотів увірити, покля сам ся не пресвідчіть так, же дотулить ся Його ребра і ран по клинцях. Кід на осмый день Ісус знова приходить через заперты двері, Тома уж увірив, но Ісус му говорить: Увірив єсь, бо єсь ня видів, но блажены суть тоты, што не виділи а увірили. Апостол увірив щіро в слова і діла хрістовы, тото не перестав вірити, о тім не зачав похыбовати, але воскресіня, тото было педметом його невіры. Тоту віру у воскесіня, же Хрістос є справды Богом, він проповідать потім в Індії, де і умер мученицьков смертьов, кідь быв пробитый копіями. Досвідчує свою віру, же кладе свій жывот за Хріста.

І мы учме ся од апостола Томы быти свідками жывого Хріста, правдивого Бога, котрый воскрес, возніс ся на небо, но знова прийде. Най наше голосіня ся не буде лем на словах, але на ділах нашого жывота. Жебы тому світу, котрый понурять ся чім далше глубше до пропасти новопоганьства, лібералізма, ненависти ку Хрістови, Його Церькви, нашым жывотом свідчіли, же сьме віруючі, же сьме учениками Хріста. Жебы сьме раз із Його уст могли чути: Блажены, котры не виділи, а увірили. Слава Ісусу Хрісту!

В неділю, 22. жолтня/октобра 2017 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. жолтня/октобра 2017 р. о 15.00, 20.00 год. і 23. жолтня/октобра  o 2.00 год. за русиньскым часом.

Фото: Гроб св. апостола Томы в Майлапурі в Індії. Жрідло – Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА