«Слово» – 20-та неділя по Сошествії Святого Духа – неділя, 9.00 год.

Ісус Хрістос приходить ку містечку Наїн. Ішло з ним много народа. По дорозі учів о Божім царьстві. Люде суть надхнены його словами. Панує в притомности Хріста радость і покій.

Коли в такім радостнім наставліню приходять ку місту, праві в тім часі оперед них іде друга процесія. Тыж там было множество народа. Але панує там жаль, смуток, безнадій. Чом? Бо выношали на похованя мертвого чоловіка, молодого, єдного сына матери, котра была вдовіця. Хто може описати жаль і безнадій, котры пановали в тій процесії смерти. А Ісус пришов ближе, дотулив ся мар. Потім повів матери: Не плач. Но не были то слова, котры як люде высловлюєме при одході когось близкого. Як бы сьме тым хотіли повісти: Своїм плачом нич не зміниш. Но Хрістове слово, не плач, цалком інше. Перед ньов не быв звычайный чоловік, але владыка неба і землі, жывота і смерти.

Його слово, не плач, є словом жывота. Бо обернув ся ку мертвому і повів: Тобі говорю встань. Выповів тоты слова в Божій силі. Тогды смерть, познаючі ся наказу Сотворителя, пропущать свого раба, котрого захопила до свойой моци. І мертвый собі сів і зачав говорити.

Так уж нихто не міг похыбовати, же справды хлопець є жывый! Тота подія указує нам на дві процесії на тім світі. Єдна є процесія жывота. В тій панує покій, радость. Друга є процесія смерти, там панує жаль, смуток, непокій. Коли ідеме з Хрістом, тогды сьме в процесії жывота. Кедь сьме без Хріста, в рабстві гріха, страсти, роскошей, самолюбства, без Бога, Його заповідей – сьме в проесії смерти.

А де веде процесія смерти? До гроба! До вічного гроба –аду, вічной погыбелі. Але днешнє слово нам говорить радостну новину. Ай кедь бы сьме ся находили в процесії смерти, процесія жывота є близко. Тот голос, котрый прозвучаз до процесії смерти а зробив з ньой процесію жывота є ту. Хрістос є близко, Його слово, не плач а тобі говорю встань, є близко нас. Але є то слово условне.

Хрістос то не робить на силу. Давать нам слободну волю. Можеме сямы рішати ці выбереме процесію смерти про наш земный жывот або процесію жывота. Слава Ісусу Хрісту!

В неділю, 22. октобра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 22. октобра 2023 р. о 12.00 год. і 23. октобра 2023 р. о 2.00 год. за русиньскым часом.