«Слово» – 20-та неділя по Сошествії Святого Духа – неділя, 9.00 год.

По выздравліню стотникового слугы Ісус быв на дорозі до міста Наін. І їли з ним його ученикы і много народа. Він учів по дорозі, вшыткы были в радости, слухали наукы і приближовали ся ку місту.

Быв то провод жывота і радости. А як были близко міста, праві выношали помершого, єдиного сына матери, котра была вдовіця. Велике множества народа ішло з ньов. Пришли, жебы єй потішыти в тім великім жалю.

Так ту видиме дві катеґорії людей. На єдній стороні іде Ісус, його ученикы і множества народа, а на дргій мертвый чоловік, сын вдовіці, і множество народа.

Кедь ся стрітили, Ісус говорить жені: Не плач. Не як звычайный чоловік в такій сітуації може повісти: Не плач, уж нич не зробиш, так то мусить быти. То не приношало потіху, але іщі векшу болесть і жаль. Ісус говорить як владыка неба і землі. Як владыка і над смертьов, котра мусить го слухати. І дотулив ся мар, і заставили ся тоты, что їх несли. А хлопцьови говорить : Тобі говорю встань. А він собі сів і зачав говорити. А оддав го Ісус його матери.

Яка велика радость наповнила тогды сердце матери. Перед тым пережываючі в безнадії, страху, як буде жыти сама. А теперь наповнена вдячностьов і радостьов. Ісус тым воскресіньом указує, же є Владыка неба і землі, жывота і смерти. Так, як повів тій жені, не плач, так втогды, коли приходиме ку ньому, з мертвов душов, коли падаме на духу про нашы гріхы, коли сьме наповнены страхом, коли приношаме нашу душу, як колись мертвого ку Хрістови, тогды і мы чуєме: Не плач.

А тыж і слова: Тобі говорю встань. Так говорить і наїшій душі при щірім покаяню. А раз повість своїм любым: Радуйте ся, бо я єм побідив.

В неділю, 30. октобра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 30. октобра 2022 р. о 12.00 год. і 31. октобра 2022 р. о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА