«Слово» – 2-га неділя Великого посту – неділя, 9.00 год.

Хотіли ся з ним дістати ку Ісусови, но про многый народ не могли. Но не тратять надію, же ся їм то подарить. Выходять на стріху, пробивають повалу і спущають хворого перед Ісуса. Ісус видячі їх віру, говорить тому невладному: Довірюй, одпущають ся тобі гріхы. Но учітелі закона го зневажають у своїх сердцях. А Ісус на то реаґує, бо своїм Духом познав до глубкы їх сердець, же так роздумують а так їм говорить: Што є легше, выздравити душу ці тіло? Тым Ісус указує, же так як при Натанаїлови, же він видить до глубкы людьского сердця. Видів віру тых людей уж од моменту, коли вышли зо свого дому а несли того чоловіка, аж по момент, коли їх віру із діл виділи і другы. А то, кідь го спуитили через стріху. Но видів і невіру, видів похыбности учітелів закона, фарізеїв а може і дакотрых із тых, котры ся зышли, жебы чули його слово.

Так днешнє слово указує нам: Ісус видить до глубин нашой душы. Што видить в днешнім часі? Віру в його слово, його науку, або невіру, похыбованя о Божой доброті а може і зневажаня? Тота доба є про нас такым выпробованьом нашого хрістіанства, ці справды належыме Хрістови, ці Йому довіряме нелем втогды, кедь ся вшытко дарить, но і втогды, кедь іншы тратять надію, падають до безнадії. Най буде про нас тот час підкріпліньом нашой віры а свідчіньом і про другых. Слава Ісусу Хрісту!

В неділю, 15. марцa 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 15. марця о 12.00 год. і 16. марця о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА