Слово» – 2-га неділя по Сошествії Святого Духа – неділя, 9.00 год.

Євагнеліє другой неділі по Сошествії од Мафтея нам говорить о приході Господа ку Ґалілейскому морю. Там увидів двох братів Петра і Андрія, як ловили рыбы, бо были рыбарі. Покликав їх: Подьте за мнов і, Я вас зроблю рыбарями людей.

А они охабили сіті а ішли за ним. Подобно покликав далшых двох братів Якова і його брата Йоана, як зо своїм отцьом Зеведейюм справляли свої сіті. І они охабили сіті і свойого отця а ішли за ним.

З того днешнього слова є барз важне слово: Подьте за мнов – покликаня на ученика апостола, але Ісус не нарушыв їх слободну волю. Они самы рішыли іти за ним. Могли зістати при рыбах, но одповіли на Ісусво слово. Друге слово є: Я вас зроблю рыбарями людей. Так Ісус кличе ловців ловити дале. Но є ту великый розділ. Ловити рыбу значіло про тоту рыбу смерть. Вытягнути єй на берег на суху землю было про ню смертьов. Лов рыбы было ділом смерти. Але Ісус кличе ловити людей. Вытягнути людьску душу з моря того світа, гріха і страстей про тоту душу значіло жывот. А так Ісус кличе ку діло жывоту. Быти тыма вєдно робітника на лові до Божого царьства.

Але наперед самы апостолы стали ся якбы тов рыбов, котра ся поїмала добровольно. Бо слово рыба по ґрецькы – ІХТНС – Ісус Хрістос Сын Божый Спаситель. Стати ся тов духовнов рыбов значіт доволити поставити ХС на перше місце в своїм жывоті. А коли они самы дали ся поїмати стали ся і ловцями другых. Череы свою проповідь о ХС Божым Сынови, через святы Тайны Крещіня, Євхарістії і далшых будуть ловити до сіті Божого Царьства.

Але тото покликаня ся повторять і теперь. І тепер ХС кличе – Подьте за мнов на лов людьскых душ – кличе до священства, монашества, єпіскопства. Але є ту і друге покликаня – кличе каждого хто одповість на тото покликаня – дати ся поїмати. Кличе невіруючого увірити, дати ся покрестити. Кличе грішника ку покаяню, ку зміні жывота. Кличе ку тому ділу жывота. Але правдивого жывота. Ку ділу жывота вічного. Він на тото пришов на землю. Подати жывот, а не смерть. Захранити душы, а не загубити.

Часто находиме тоты слова. Лікаря не потребують здравы. Сын чоловіка пришов глядати і спасити тото, што пропало. А так і мы дайме ся поїмати до той сіті любви, радости, Божого одпущіня. А жебы і через приклад той зміны указовати і іншым дорогу ку Хрістови. Слава Ісусу Хрісту!

В неділю, 7. юла 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 7. юла 2024 р. о 12.00 год. і 8. юла 2024 р. о 2.00 год. за русиньскым часом.