Слово» – 2-га неділя по Сошествії Святого Духа – неділя, 9.00 год.

Ісус Хрістос переходить коло Ґалілейского моря, коли увидів двох – Петра і Андрія, як спущали сіті на лов. І кличе їх: Подьте за мнов, а я вас зроблю рыбарями людей!

Подобно увидів другых двох братів – Якова і Йоана, як зо своїм отцьом Зеведейом справляли свої сіті. Закликав і їх. Они вшыткы такой зохабили сіті, а ішли за ним.

Ісус кличе першых учеників а говорить їм: Я вас зроблю рыбарями людей. Поїмати рыбу, то про ню значіло смерть. Ісус кличе апостолів быти ловцями людскых душ. Ловити з моря того світа до сіті Божого Царьства. Зо смерти до жывота, з рабства діявола і гріха до слободы Божых дітей.

Пізніше кличе і далшых учеників, єдных быти апостолами, далшых сімдесять быти їх помічниками. Але Ісус не переставать кликати ани днесь. Пригварять ся тым, котры мають отворене сердце. Єдных за священиків, далшых за монахів, далшых за єпіскопів. А сам призывать ку молитві за добры покликаня. Просьте Господаря жнив, жебы выслав робітників на свої жнива. До роботы на Божім полі.

Но тото покликаня не значіть легку дорогу. Говорить своїм ученикам: Я вас посылам як вівці міджі вовків. Будуть вас переслідовати, многы вас высміють, не приймуть вашы слова, будуть вас мучіти, будете веджены перед царів і владыків, жебы сьте выдали свідчіня о мі. Але тыж додав: Коли вас не приймуть, одходячі стрясьте собі і порох із вашых ніг, на свідчіня проти них. Но легше буде землі содомскій і ґоморскій як тому місту або такій душі на день судный.

Тоты слова Ісус адресує і нам. Молити ся за новы і добры покликаня, але і за тых, котры покликаны, за то, жебы были добрыма єпіскопами, священиками, монахами, і жебы в тім полкиканю вытримали до кінця.

Но тото слово говорить ку нам тыж: Мерькуйте, як слухате Боже слово. Не слухайте поверьхово. Бо тому, хто одверьгне слово спасіня, буде на судный день гірше, як землі содомскій і ґоморскій. Прото приймиме тото слово: мольме ся за покликаня, а самы слухайме тото слово на своє спасіня, а не одсуджіня. Слава Ісусу Хрісту!

Так днешна неділя нас позывать – будьте святы, зростайте в любви ку Богу і ближньому. Тото діло робить в нас Святый Дух, котрый нас надхынать ку любви і веде по дорозі ку святости.

В неділю, 18. юна 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 18. юна 2023 р. о 12.00 год. і 19. юна 2023 р. о 2.00 год. за русиньскым часом.