«Слово» – 2-а неділя по Сошетствії Святого Духа – неділя, 9.00 год.

Днешня 2-на неділя по Сошествії Святого Духа говорить о поклканю першых учеників. Ісус приходить ку Ґалілейскому морю, де находить 4 учеників, Петра, Андрія, Якова і Йоана. Їх кличе: подьте за мнов. Они зохабили свої сіті а ішли за ним. Ісус не ішов ку земным царям, жебы їх покликав а дав доказы свого божества, і так легко здобыв в послухняности собі цілый світ. Але іде іншов дорогов. Бо Боже думаня і його дорогы суть іншы як тоты нашы. Ісус выберать собі неуків – рыбарів, через них тых, котры увірять їх проповіді. Ісус і нас кличе, ці уж іде о наше властне покликаня до духовного ставу священства, ці монашества ці приходить до нашых родин і кличе сына, дівку, внучку: подь за мнов. Не бійме ся одповісти на тото покликаня позітівно. Не будеме обаламучены. Бо не чоловік кличе, але жывый Бог. Або ці іде о покликаня ку покаяню, ку зміні думаня, зохабліню старых выходженых стежок, зохабліня старого чоловіка з його пожадливостями, роскошами, ку новому жывоту в добродітелі, чесноті і святости. Апостолы ся не звідовалы, не догадовали ся з Ісусом: де нас кличеш, як будеме жыти і под. Увірили Його слову. І мы наслідуйме їх приклад, знаючі, же мы не самы, же Він є з нами. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА