«Слово» – 18-та неділя по Сошетствії Святого Духа – неділя, 9.00 год.

Ісус при Ґеназеретьскім озері учіть народ, наступивши до єдной з лодьок, што там были. Належала Сімонови Петрови.

Як закінчів, говорить му: Спусть сіті до глубшой воды. Сімон му одповів: Учітелю, мы мозолили цілу ніч і нич мы не хопили, но кідь ты кажеш – я спущу. Кідь так зробили, поїмали множество рыб аж ся сіті торгали, і наповнили обідві лодькы. Днешнє євангеліє нас учіть о послухняности Божому слову. Видиме послухняность Сімона Петра і далшых із апостолів, котры кідь послухали Ісуса, і коли їм розум говорив, же то не мать значіня, бо цілу ніч мозолили без успіху. А предці, кідь зробили так, як Ісус казав, не были скламаны. Видиме і послухняность бессловесных рыб, котры ся підряджують наказу свойого Сотворителя і кладуть свій жывот ку ногам Ісуса.

Учме ся з днешнього Євангелія кажде наше діло робити з Божым благословілньом, бо лем тогды буде успішным і принесе хосен нам і ближным. А як хочеме своїма силами, операючі ся на свої способности, свій розум, тогды выслідком буде: мы мозолили і даремно. Бо Ісус на іншім місці ясно каже: Без мене нич не можете зробити. Слава Ісусу Хрісту!