«Слово» – 18-та неділя по Сошествії Святого Духа – неділя, 9.00 год.

Ісус Хрістос приходить ку Ґенісаретьскому озеру. Там ся посходило велике множество народа. Так выхосновав, же были там дві лодькы. Насів до єдной із них, котра належала Сімонови Петрови. А з лодькы учів народ, попросивші Сімона Петра, жебы одплавив ся недалеко од берега.

Коли закончів, говорить йому: спусть сіті до глубокой воды. Но Сімон йому одповів: Та мы ся намагали цілу ніч а без успіху, мы нич не хопили. А теперь, коли уж сонце высоко, наказуєш спустити сіті. Сімон Петро быв і нервозный, і невыспатый, перемоченый од ночного лову. І намаганя, а рыб ниґде. А теперь мав знова повторити? А кедь нич не хоплять?

Його скушености і прінціпы ловліня рыб йому говорили: тото не мать змысел. Але Ісус нароком выбрав його лодьку, із котрой учів. Хотів своїма совами дати потіху і підкріпити у вірі Сімона Петра. А так і під впливом того, што чув з проповіді Ісуса, хоць мы то не знаме, што Ісус учів. Но то не є важне, важне є то, што є записане, жебы сьме прияли а тото выстарчіть. Хоць його розум му діктовав, не роб то уж. Но він повів Ісусови: На твоє слово так зроблю, спущу сіті. А коли так зробив, поїмав таке множество рыб, же аж сіті ся торгали і наповнили і далшы лодькы, котры там были.

Тогды Сімон Петро повів Ісусови: Господи, ідь од мене, бо я грішный чоловік. А Ісус йому повів: Не бій ся, одтеперь будеш ловити людей. А они зохабили сіті і лодькы а ішли за Ісусом.

Тото слово нам указує велику правду, котру Сімон Петро выразив перед Ісусом: Мы ся намагали, а мы нич не хопили. Бо коли робиме без Божого благословліня, тогды закінчує ся то неуспіхом. Но як то Сімон Петро зробив на словах Ісуса, тогды, ай кедь з людьского погляду там была маленька надія на успіх, пришов великый успіх.

Тото слово і нас учіть у вшыткых нашых ділах выпрошовати Боже благословліня, жебы не зазнати то, што Сімон Петро: Мы нич не хопили. Мы мозолили даремно. Але жебы ся наповнили слова: На твоє слово… і поїмали велике множество рыб. Слава Ісусу Хрісту!

В неділю, 27. октобра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 27. октобра 2024 р. о 12.00 год. і 28. октобра 2024 р. о 2.00 год. за русиньскым часом.