«Слово» – 17-та неділя по Сошествії Святого Духа – праздник Рождества Пресвятой Богородіці – неділя, 9.00 год.

Празднуєме праздник Рождества Пресвятой Богородіці. Нашы літурґічны тексты характерізують тот праздник єдным словом, котре часто повторять ся на многых місцях текстів вечурні ці утрені. І то є слово радость.

Тропарь праздника нам говорить: Рождество твоє Богородіце Діво возвісти радость всей вселеній… Твоє рождество Богородіце Діво звістовало радость цілому обываному світу. Самоперше тота радость належала родічам, Йоакімови і Анні, котры хоць жыли справедливо, не мали дітей, што ся тримало в тім часі за одвергнутя од Бога ці покараня за грішность. Они не переставали вірити і Бог одмінив їх віру великов радостьов із народжіня дівчінкы. Далше текст говорить: Із тебе бо возсія Солнце правды Хрістос Бог наш, і разрушыв клятву даде благословеніє і упразднив смерть дарова нам жывот вічный. Бо із тебе засвітило Сонце справедливости Хрістос наш Бог, котрый розрушыв проклятя, дав нам благословліня, зничів смерть, даровав нам вічный жывот. Ту є далшый аспект той радости. Она стала ся матірьов Божого Сына, Спасителя, котрый знищів владу смерти, зрушыв проклятя, приніс благословліня і подаровав нам вічный жывот. А так тота радость переходить на каждого чоловіка. Бо ку каждому односить ся діло спасіня, і дар спасіня. Што было основов того плоду, котрый Марія принесла. Она стала ся плодоноснов земльов і принесла благословленый плод Хріста. Яке велике благословліня принесло то, же Марія прияла Слово до свого жывота, свого сердця, сохраняла го і жыла ним. Так могла прияти Слово Втілене, сохраняти в утробі і даровати тот плод світу.

Їй праздник і нас позывать, жебы стати ся плодоноснов земльов, котра прийме плод Божого слова, буде його сохраняти в собі і його жыти і так принесе плод спасіня про себе і про другых. Най Пречіста Богородіця, котра тото практіковала цілый свій жывот своїм: „Най буде мі подля Твойого слова,“ і нам помагать тото реалізовати. Амінь.