«Слово» – 16-та неділя по Сошествії Святого Духа – неділя, 9.00 год.

Образный приклад о царьови, котрый одходячі на дорогу розділив своїм рабам маєток, нам говорить о одповідности за звірены таленты.

Єден раб прияв пять талентів, другый два а третій лем єден. Каждый з них наложыв із тыма талентами різным способом. Першй здобыв другых пять, другый другы два. А тот, што прияв єден талент, пішов і закопав його до землі.

Кедь ся царь вернув, зачав раховати ся зо своїма рабами. Тому, котрый здобыв другых пять і тому, котрый здобыв другы два, говорить слова: Добрі, рабе добрый і вірный. В малім ты быв вірный, над многім тебе установлю. Подь до радости свойого пана. Тот, котрый прияв єден талент і його закопав і тепрь го вернув, учув такы слова: Рабе підлый і лінивый.

Господь каждому дав свої дары – таленты, жебы сьме через них здобыли далшы. Але дав нам слободну волю. Можеме їх помножыти подобно тым, котры прияли пять ці два. А якым способом? Так, же будеме з нима господарити – то є, же даме їх до служіня любви ку ближнім. Тогды ся не тратять, але множать.

Або їх можеме выхосновати лем на свої выгоды, на своє самолюбство, а тогды їх закопуєме. Або тыж выхосновати їх на зло. Але раз прийде момент здаваня рахунку. Тогды яка радость буде чути слова: Добрі, рабе добрый і вірный… Але яка біда буде учути: Рабе підлый і лінивый.

Перше зо собов несе радостне позваня до вічной радости, друге одосланя до вічной погыбелі. Прото памятайме на то, же кому веце было дане, веце будуть пожадовати. Старайме ся выхосновати звірены таленты до служіня любви ку ближньому, жебы сьме раз могли і мы учути – добрі рабе добрый і вірный – подь до радости свогого пана. Слава Ісусу Хрісту!

В неділю, 10. октобра 2021 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. октобра о 12.00 год. і 11. октобра о 2.00 год. за русиньскым часом.