«Слово» – 15-та неділя по Сошествії Святого Духа – неділя, 9.00 год

За Ісусом приходить учітель закона і звідує ся: Котра заповідь в законі є найвекша? Но Боже слово нам говорить, же тот чоловік пришов не нато, жебы глядав одповідь на свій вопрос, но жебы спокушати Ісуса.

Жыде веце раз пробовали поїмати Ісуса на словах, но не могли. Ці коли хотіли од Нього одповідь, яков владов робив порядкы в храмі. Або як хотіли садукеї, котры не вірять у воскресіня, высміяти віру у воскресіня повіданьом о семох братах, котры поступно брали собі єдну жену. Або як хотіли поїмати Його вопросом, ці треба платити поплаткы цісярьови або не треба. В тых вшыткых сітуаціях Ісус легко заганьбив своїх противників, але свойов одповідьов давав їм принагоду подумати і увірити.

Так і в днешнім слові давать Ісус одповідь: Слухай Ізраіль… Будеш любити Господа Бога цілым сердцьом, душов… а свого ближнього як самого себе. Тот учітель закона подумав собі: добрі одповів. Так є. А Ісус йому нато: Не єсь далеко од Божого царьства.

Ту видиме стараня представителів народа поїмати Ісуса на словах, они, котры прияли благодать познаня, але не выхосновали на свій хосен і спасіня. А з боку Ісуса гляданя і той найменшой іскеркы віры ці добра, жебы міг подати свою благодать. Бо Він не хоче смерти грішника, но то, жебы обернув ся і жыв.

Так коли видів іскерку в сердці того учітеля закона, такой давать йому можность то выхосновати: не єсь далеко од Божого царьства. Він гаснучій кнотик недогасить і надломленой терстины не доломить. А коли давать одповідь односно найвекшой заповіді – заповіді любви, сам є тот, котрый давать на ділі приклад як маме робити.

Жебы сьме тоту найвекшу заповідь тримали не лем на словах у своїх устах, але жебы сьме єй выповняли і нашым жывотом. Слава Ісусу Хрісту!

В неділю, 17. септембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 17. септембра 2023 р. о 12.00 год. і 18. септембра 2023 р. о 2.00 год. за русиньскым часом.