«Слово» – 15-та неділя по Сошествії Святого Духа – неділя, 9.00 год

Коли Ісус Хрістос проповідав Євангеліє Царьства, сходило ся ку Ньому велике множество народа. Быв то простый народ, многы в Писмах были неуками, але отвореным сердцьом слухали Його слова.

А архієреї, фарізеї, учітелі закона, котры мали быти першыма, што признають месіяньске посланя Хріста, затвердили свої сердця. Глядали способы, як Його поїмати на слові, ці проти Рима, ці Мойсейового закона, або зничіти Його славу меджі людми, а жебы могли Його одсудити.

Так посылають єдного учітеля закона, котрый приходить якбы з добрым наміріньом, глядаючі одповідь на вопрос, котра заповідь є найвекша і найголовніша. Ісус знав, же тот чоловік пришов Його покушати, а не глядати одповідь. Але і так давать йому одповідь. Найголовніша заповідь є любити Господа Бога понад вшытко на тій землі. Дати ся Йому в цілости. Зо вшыткыма думками, душов, силами. А друга є подобна заповідь – любити свого ближнього.

Тот чоловік собі думав, же може перехытрити Хріста, не знав о тім, же перед ним стоїть Найвекша Мудрость. Но Ісус тов одповідьов і ласкавым приступом указує, же Бог любить каждого, а хоче його спасіня.

Тым давать приклад і про нас, жебы і мы так любили нелем своїх приятелів, але і неприятелів. Слава Ісусу Хрісту!

В неділю, 25. септембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 25. септембра о 12.00 год. і 26. септембра о 2.00 год. за русиньскым часом.