«Слово» – 14-та неділя по Сошествії Святого Духа – неділя, 9.00 год.

Образным прикладом о свадьбляній гостині нам Господь наш Ісус Хрістос указує на блаженство Божого царьства. Ісус хоснує образ свадьбы – як часу радости.

Говорить о царьови, котрый приготовив свадьбу свойому сынови. Як было вшытко приготовлене, послав своїх рабів повісти покликаным: Подьте на свадьбу. Но они зачали ся выгваряти, єден на своє поле, другый на свій торг. Так послав далшых рабів. Но они собі тото не цінили, тых рабів убивали, понижовали. Царь ся розгнівав, послав войско, выгубив місто і тых покликаных.

Так ту видиме, як Бог старав ся о свій народ, цілый час їх кликав. Посылав пророків. Посліднім із тых старозавітніх пророків быв святый Йоан. Но Жыды то одверьгли, хоць тілько часу Бог їм давав. Докінця по Воскресіню чекав довгу добу 40 років. Аж так, коли зістали завзято одверьговати Його покликаня, місто і його жытелі были зничены. Подробно о тых стршаных подіях паду Єрусалима пише Йосиф Флавій.

В другій частині говорить Царь рабам: Покликаны не были достойны мойой гостины. Ідьте тогды на розпутя і кличте вшыткых, кого найдете.

Ту говорить о апостолах, котрых выслав до цілого світа. Они далше свойов проповідьов кличуть: Подьте на свадьбу. Но так як тогды, і теперь ся многы выгваряють. Єдны на поле – образ жывота в роскошах, нестриманости жалудка і тілесной пожадливости. Другы на торг – образ матеріалного богатства, привязаности ку земному. Єдно і друге заберать сперед очей погляд ку вічности а напрямує лем ку тому земному – ту і теперь, не думай на смерть, на вічность.

Прото Ісус говорить о многых покликаных, але мало выбраных. Господь хоче спасити вшыткых людей, робить про тото вшытко. Так кличе каждого: Подь до мойого Царьства. Но то, же мало выбраных, указує на проблему на стороні покликаных, котры тото не прияли. Погордли тыма, котры їх кликали, а тым образили і самого Царя.

Най о нас не платять тоты слова. Але старайме ся нашов одповідьов быти не лем покликаны, але і выбраны. Слава Ісусу Хрісту!

В неділю, 10. септембра 2023 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 10. септембра 2023 р. о 12.00 год. і 11. септембра 2023 р. о 2.00 год. за русиньскым часом.