«Слово» – 14-та неділя по Сошествії Святого Духа – неділя, 9.00 год.

Ісус Хрістос в днешнім слові говорить нам другый образный приклад – о царьови, котрый приготовив свадьбу свойому сынови. Послав рабів повісти закликаным, жебы уж пришли, но они не захотіли. Послав другых, і тыма погордили, або їх убили.

Та місто выгубив а послав рабів на роспутя, жебы закликали вшыткых якых найдуть. Тото слово нам говорить о пророках і апостолах, котры кликали выбраный народ до Божого царьства. Потім, апостолы діставають наказ іти прповідати вшыткому сотворіню. Так пришло до Божой Церькви много добрых і планых.

Дале образный приклад говорить, же Царь пришов посмотрити а увидів там чоловіка без свадьбляного облечіня. І повідать йому: Приятелю – жебы тым дати знати, же Він не хоче карати никого, хоче спасіня каждого чоловіка, і додавать – як ты міг войти без облечіня?

Но мы собі можеме повісти, же што кедь быв бідный а не міг собі доволити таке облечіня. Лемже Царь, кедь послав запросити, прислав і облечіня. І мы, кедь сьме были покрещены, сьме прияли біле облечіня, як знак того духовного облечіня, котре маме сохранити в нашій душі непорочне а чісте аж до нашого одходу ку Господу.

Так тот чоловік не мав выгварьку, бо або стратив або одшмарив тото облечіня, так образив царя. І мы тото облечіня можеме стратити або одшмарити через гріх, страсти, привязаня ку земному, оддліня од Бога.

А што кедь ся так стане, уж не є надія? Но маме і друге средстцо – покаяня, як то видиме на блуднім сынови. Принести йому перше облечіня. Тото перше облечіня є ай тым славностным свадьбляным облечіньом. Кедь робиме покаяня, щіро ся высповідаме, Господь нам вертать тото перше облечіня.

Но тот чоловік пришов без нього, зато чує слово: Звяжте го на руках і ногах і шмарте до вонкашньой тмы, там буде плач і скреготаня зубів. Тот чоловік собі уж выбрав – рукы, котрыма творив діла беззаконости а ногы, котры ішов на дорогу гріха. Послухайме люблячого Господа, коли нас кличе ку покаяню, коли має на своїх руках наше облечіня, жебы сьме не учули страшны слова: Приятелю, як ты міг войти без свадьбляного облечіня то? Слава Ісусу Хрісту!