«Слово» – 13-та неділя по Сошетствії Святого Духа – неділя, 9.00 год.

Євангеліє 13-ой неділі нам описує образный приклад о робітниках у винограді. Дістали до справованя виноград приготовленый і мали давати частку з плодів. Як пан винограду післав рабів, жебы перевзяли плоды, они єдных убили, далшых знечестили і післали напорожньо. Післав іншых, зробили так само. Наконець післав свого сына. Но они сі повіли: Як його убєме, наш буде виноград. Тот образный приклад вказує на Боже человіколюбя ку людьству а окремішньо выбраному народу. Рабы суть пророкы, котры мали перевзяти частку з плодів  у вірности і послухняности Божым заповідям. Но намісто того были убиваны. Наконець Жыды убивають і Сына Божого. Виноград так переходить ку іншым, то є ку новозавітній Церькви. Тот образ, приклад, і нас напоминать, жебы сьме не забывали, же мы не маїтелі але справцьове. Же вшытко, што маєме, маєме од Бога. І нашов частков є зістати вірныма Божому Слову, його заповідям. Одповідати на його дары нашов вдячностьов і любвов. Робітникы в днешнім євенгелію забыли, же суть лем справцьове винограду, зачали ся справовати так, як бы їм належав виноград. Не наслідуйме їх приклад. Не одвергуйме Бога в надії, же тогды сі можеме жыти як хочеме. То можеме лем до істого часу. Мерькуйме, жебы і о нас не платило, же виноград передасть іншым. Слава Ісусу Хрісту!