«Слово» – 13-та неділя по Сошествії Святого Духа – неділя, 9.00 год.

Євангеліє 13-ой неділі по Сошествії Сятого Духа подавать нам образный приклад о робітниках у винограді. Пан винограду постарав ся о вшытко, приготовив виноград аж так йохо передав робітникам і одышов.

В часі збераня плодів послав рабів перевзяти частку із винограду. Но робітникы не думали на то, жебы то выповнили, але тых высланых перевзяти плоды – єдных убили, другых побили камінями. Потім послав другых рабів, але зробили так само. Наконець посылать свойого Сына. Но робітникы у своїй злобі задумують убити і його, жебы захопили наслідство про себе.

Но таке роздумованя не принесло їм хосен. Бо Пан винограду прийде злых із гнівом убє а передасть іншым. Тото слово говорить нам о Божій любви, Божій доброті і Його старостливости о выбраный народі каждого чоловіка. Посылать свої дары, подавать благодать а зато пожадує лем єдно – приношати Йому плоды. Плоды віры, любви, добрых діл і щірого покаяня.

Але тоты робітникы собі зачали надумовати, же они суть панами винограду. Не признали над собов никого. За тоту старостливость пана винограду ся одмінили свойов невдячностьов. Так поступує невдячный чоловік в одношіню ку Господу Богу. Не хоче признати Його авторіту. Слухати Його заповіді. Приймать тоту пораду злого, котрый бунтує ся проти Бога а нашептавать – не потребуєш Бога, Його заповіді, ты можеш быти на місці Бога.

А якый смутный конець: Підлых із гнівом убє. На страшнім суді, коли прийде судити і одплатити каждому подля його діл. Прото не наслідуйме приклад тых підлых рабів. Но оддавайме Господу плоды нашой любви, добрых діл і щірого покаяня. Слава Ісусу Хрісту!