«Слово» – 13-та неділя по Сошествії Святого Духа – неділя, 9.00 год.

Образный приклад о робітниках у винограді указує на Боже человіколюбя і старостливость о выбраный народ. Указує тыж і невдячность выбраного народа ку Господу Богу.

Так, як господарь вшытко приготовив – насадив, огородив плотом, выбудовав преш на вино, а аж так передав робітникам і одшлов, подобно Господь Бог дбать о свій народ. Як надышов час збераня грозна, послав рабів, жебы перевзяли плоды, єдны били робітниками убиты, далшы побиты, далшы зневажены. Послав другых, но і тоты скінчіли так само. Наконець посылать свойого сына, але і того вывели із винограду і убили. Так сі хотіли привластнити виноград.

Кедь посмотриме на історію Старого завіта, Бог тыж посылать своїх пророків, жебы прияли плоды віры і любви. Жебы напоминали выбраный народ, кедь ся одхыльовав ку ідолопоклонству. Они пророків зневажали, убивали. Ісус о тім свідчіть, кедь перед входом до Єрусалима плаче над містом: Ты, котрый убиваш пророків… Наконець приходить сам Сын Божый і того вывели вон і убили на кресті.

Ісус закінчує тот образный приклад – од вас ся возьме Царьство Боже і дасть ся народу, котрый буде приношати плоды. Так ся і стало. Ісус говорить о новім народі, о Божій Церькви, до котрой суть покликаны із каждого народа. І ту суть тоты условія – приношати плоды віры і любви.

Так Господь адресує тоты слова і нам, жебы сьме не были подобны тым робітникам. Приношайме, покы маме час, плоды віры і любви ку Богу і ближньому. Слава Ісусу Хрісту!

В неділю, 6. септембра 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 6. септембра о 12.00 год. і 7. септембра о 2.00 год. за русиньскым часом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА