«Слово» – 13-та неділя по Сошествії Святого Духа – неділя, 9.00 год.

Образный приклад о робітниках у виногаді нам вказує на Божу старостливость і велику любов Бога ку чоловікови. Уж на початку сотворіня Бог наперед выштко приготовив, і аж пак сотворив чоловіка як царя, жебы над вшыткым пановав.

Подобно было і з выбраным народом. Бог старать ся о нього. Давать йому закон через Мойсея, заповіді, жертвы, храм. Посылать пророків, жебы напоминали народ ку вірности і любви ку Богу. Но они єдных убили, іншых знечестили. Так послав далшых і зробили з нима тото саме. Наконець послав свойого Сына. Говорить собі: Хоць не прияли рабів, мого Сына ся будуть ганьбити. Но они, кедь увиділи сына, повіли собі: То наслідник, подьме убийме го, і наслідство буде наше. А так і зробили. Але нелем же не набыли наслідство, но іщі і утратили виноград. Бо Ісус закінчів тот образный приклад словами: Што зробить пан винограду такым підлым рабам? З гнівом їх выгубить і виноград передасть іншым, котры будуть передавати плоды в даный час.

Робітници у винограді сі зачали надумовати, же они суть дашто веце. Же не суть лем справцями винограду, котры мають над собов пана, але же они суть панами, котры рішають о вшыткім. Якы затемніня, яка невдячность. За добро одвдаячують ся злом і убийством. А тото ся діє, кедь чоловік забывать на Бога. Кедь хоче забрати Його місце у своїм жывоті. Кедь сам хоче рішати і назначовати собі правила што є добре і што плане. А до даякаго часу так може робити, бо чоловім мать слободну волю.

Ісус вказує в днешнім слові на велику любов і велику Божу терпезливость з грішником. Бог не хоче смерти грішника, но його навернутя і жывот. Так робив з выбраным народом, так робить і з нами. Но раз прийде момент давати рахунок. Прото не будьме подобны тым невдячным робітникам, але приношайме плоды вдячности, віры і любви. Слава Ісусу Хрісту!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА