«Слово» – 12-та неділя по Сошествії Святого Духа – неділя, 9.00 год.

За Ісусом приходить молодый чоловік а давать йому вопрос: Учітелю добрый, што доброго мам робити, жебы єм набыв вічный жывот? Тот чоловік давать барз важный основный вопрос, котрый собі маме давати каждый день.

А Ісус давать йому одповідь: Хочеш войти до жывота, дотримай заповіді. Він ту не давать повне вырахованя вшыткых заповідей, лем выберать із заповідей любви ку ближньому. А кедь тот чоловік одповів, же тото вшытко уж дотримав од маленька, на тото йому Ісус повів: Кедь хочеш быти досконалый, ідь, продай што маш, роздай бідным. Потім прийдь а мене наслідуй.

Но тот чоловік одышов смутный. Мав великый маєток. Ісус одкрывать його хвороту – привязаность ку свойому маєтку. Прото подавать йому лік. Коли мене послухаш, не стратиш, не будеш бідным. Але будеш богатый небесным богатством. Но він одышов.

Ісус його не сперать, не затримує. Але говорить ку апостолам: Як тяжко войти богатому до Царьства Божого. А потім Ісус додав: Што у людей не може быти, у Бога вшытко може быти. Тому, хто є богатый на привязаность ку матеріалному богатсву, ку роскошам, ку страстям душевным, ку гріхам, тому є тяжко войти. Ісус не говорить, же не може войти. Бо Ісус подавать лік каждому, ослободжіня од той привязаности, тогды ся про чоловіка отворять вход до Царьства Божого.

Ісус і нам давать тоту понуку. Ослободити ся од привязаности богатства, страстей і гріха. Прийти ку Ісусови, він нам предкладать богаство, котре є правдиве. Є на нас, што собі выбереме. Діавол старать свою жертву собі утримати. Нашептавать: Про тебе уж не є спасіня. Але Ісус говорить: Не бій ся не смоть на то, што было. Лем ідь, або скорше прийдь ку мі. Я ті дам слободу а богатство неба.

А коли послухаме Його слово, раз, в годині смерти порозуміме: Справды оплатило ся послухати голос Хріста а прияти Його понуку а не слухати діавола. Слава Ісусу Хрісту!

В неділю, 4. септембра 2022 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 4. септембра о 12.00 год. і 5. септембра о 2.00 год. за русиньскым часом.