«Слово» – 11-та неділя по Сошествії Святого Духа – неділя, 9.00 год.

Кебы сьме собі дали вопрос, котра частина Євангелія є про нас найважніша або належыть ку тым найважнішым? Так днешнє слово о Царьови, котрый робив рахунок зо своїма рабами ку такым належыть. Говорить нам подію, коли перед царя привели довжника – раба з великым контом довгу десять тісяч талантів.

Мы не знаме собі такый довг ани представити. Євангеліє нам не говорить як ся таке могло стати. Говорить нам лем о тім, што стало ся. Тот раб (дулос) довговав спомянуту частку. За то йому грозило проданя його, жены і дітей, жебы сплатив довг. Тот раб але просить о великодушность Царя. А він і быв. Одпустив того раба на слободу і одпустив йому довг.

Тым Царьом є Господь Бог і тыма рабами сьме мы. Довгы суть нашы гріхы. Коли мы просиме Бога о одпущіня, з легкостьов нам вшытко одпущать. Указує нам тото слово на превелику любов Бога ку чоловіку. Не є гріха, не є того довга, жебы Бог не міг оспустити. Тото значіть тота великость довга.

Но тот раб стрітив свого сораба (сіндулос), котрый йому довговав 100 дінарів. Но маленька частка, но і так хопив, дусив і говорив: вертай довжне. А він реаґує тыма самыма словами: будь ку мі великодушный. Но тот не хотів. Дав го заперти до вязніці.

Але Царь го другый закликав. І тепрь уж называть його понире – лукавый, діавольскый. Іншыма словами. Уж меджі нами нич общого не є. Ты не проявив милосердя, ани тобі уж не буде проявлене. І наказав його продати, і жену і діти, покы не сплатить вшытко.

Ісус Хрістос закончує тот образный приклад словами: Так зробить мій небесный Отець із вами, кедь од сердця не одпустите свойому ближньому.

Отцьове Церькви говорять о тім двоякым закликаню: Єдно є ту на землі. Ту є споєне з милосердьом, приготовленостьов одпуищати нашы гріхы. Друге є на страшнім суді. Ту нам Господь одпущать не раз, але сімдесять сім раз і веце. Все, коли його просиме. Там, уж є немилосердным судцьом нашых слов, діл і думок. А біда тогды, коли сьме неприправлены. Тогды будуть платити слова: Так зробить вам і мій небесный Отець, коли каждый із вас од сердця не одпустить. Слава Ісусу Хрісту!

В неділю, 8. септембра 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. септембра 2024 р. о 12.00 год. і 9. септембра 2024 р. о 2.00 год. за русиньскым часом.