«Слово» – 1-ша неділя Великого посту – неділя, 9.00 год.

Перешов першый тыждень святой Чотыридесятніці, того благодатного Богоданного часу на наше очіщіня і приближіня ся ку Богу. Церьков нам передкладать три средства в тім часі. А то: піст, молитву а милостыню.

А якраз великость і цінность посту нам указує перша субота святой Чотыридесятніці, коли собі припоминаме велике чудесне діло, діло Божой доброты а старостливости. Діло, котре указало, як Бог собі цінить правдивый піст, а же не опущать своїх выбраных а вшыткы силы неприятелä хоць як снують тайны планы, нич не зможуть проти тых, котры суть Хрістовы.

Діавол выхосновав судину – імператора Юліяна, котрый быв покрещеный, котрый быв сучасником і св. Василія, вєдно штудовали в Афіні. Но котрый одрік ся од Хріста а прихылив ся ку поганству. А накілько познав хрістіаньскы традіції і значіня святого посту, быв ідеалнов судинов в руках діавола на реалізацію діаволского плану на высміяня хрістіанства, а і самого Хріста.

Што він за помочі діавола задумав? Дав наказ покропити вшытки їдла на торгу, котры хрістіаны куповали в суботу, кровльов зо звірят, котры были жертвованы в поганьскых храмах. І так хотів посквернити хрістіанів, котры брали ся щіро першый тыждень за подвиг поста. Жебы так міг сміяти ся над нима. Нихто о ничім не знав. А не было силы, як собі Юліян думав, жебы му дахто змарновав його планы.

Но як ся пише в другім псалмі: Господь буде сміяти ся над нима. Так вышов на сміх і Юліян. Господь послав свого мученика Теодора, котрый выдав свідчіня о Хрістови і довго мукареный голодом у вязніці, а потім одсудженый на спаліня огньом став ся цілоспалюючов жертвов, приємнов аромов про Господа, жебы тот змарновав планы Юліяна. Теодор появив ся патріархови Цариграду Евдоксіови і йому наказав: най нихто не купує нич на торгу, але най собі люде зварять коливо – варену пшеніцю з медом. І так быв змаронованый тот діаволскый план Юліяна і Господь прославив ся.

Перша неділя указує на далшу побіду: побіду над іконоборством за імператориці Теодоры і патріарха Методія в р. 842. Тогды торжесвеным способом было обновлене на радость цілой Церькви оддаваня чести святым іконам.

Днешнє слово Євангелія нам говорить, як Ісус покликав Філіпа на апостола. А тот нашов Натанаїла, котрому радостно говорить: Мы нашли Месію, Ісуса із Назарета. Но Натанаїл зареаґовав скептічно: Ці може быти із Назарета дашто добре? А Філіп йому повів: Подь і посмоть.

Так і нам Церьков указуючі на тоты великы і чудесны Божы діла говорть: Подь і посмоть, што Господь робить в жывоті своїх вірных. А што хоче робити і в нашых жывотах, коли буде на Його стороні. Слава Ісусу Хрісту!

В неділю, 9. марца 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 9. марца 2025 р. о 12.00 год. і 10. марца 2025 р. о 2.00 год. за русиньскым часом.