«Слово» – 1-ша неділя Великого посту – неділя, 9.00 год.

Перша неділя Святого посту нам говорить о потребі правдивого покаяня. Быти правдивым хрістіаном. Ісус Хрістос приходить до Ґалілеї, покликав на апостола Філіпа словами: Подь за мнов.

Філіп нашов Натанаїла, котрому такой звістує: Мы нашли Месію, о котрім писали Мойсей і пророкы. Коли Натанаїл чув о Назареті, зачудовано говорить: Ці може быти з Назарета дашто добре? Но Філіп йому повідать: Подь і посмоть. Коли Натанаїл пришов ку Ісусови, Ісус о нім говорить: То правдивый Ізраїльтян, в котрім не є фалшивости.

Ісус Хрістос давать похвалне свідчіня Натанаїлови, же быв правдивым. Глядав правду. Не мав в собі фалшивости. Тото є вызва і про нас в часі Святого посту, котрый святый Василій называть часом благодатным, часом Божого лічіня. Жебы заставити ся, подумати над своїм жывотом.

Може і о мі Ісус Хрістос повісти – правдивый хрістіан, в котрім не є фалшивости, в нашых словах, ділах і думках. Коли ся в правді засмотриме, увидиме, же маме далеко до того. Но єдночасно, не маме падати на дусі, коли увидиме тоту розділность меджі тым, чім ся декларуєме – то є хрістіанами, наслідователями Хріста, а реалностьов жывота.

Бо тот час є на то глубоке познаня а на роботу над собов за помочі Божой благодати. Слава Ісусу Хрісту!

В неділю, 24. марца 2024 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 24. марца 2024 р. о 12.00 год. і 25. марца 2024 р. о 2.00 год. за русиньскым часом.