«Слово» – 1-ша неділя Великого посту – неділя, 9.00 год.

На закончіня першого тыждня Великого Посту нам СВ. Церьков ставить перед нас пиркалд божой присутности і всевідучости.

Субота першого тыждня Великого Посту указує нам чудесну подію св. мученика Теодора. Імператор Юліан хотів знеужыти, высміяти хрістіаньскый піст а тым і самого Хріста, а наконець быв высміяный сам імператор. Юліан дава наказ, жебы покропити вшыткы їдла на торгу ідоложертвеннов кровльов. Теодор ся появлять єпіскопови і наказує позберати своє стадо і приказати нич не куповати, но їсти варену пшеніцю з медом – коливо. Так быв высміяный тот, хто сміяв ся з хрістіанів, тым і з Господа Бога.

Неділя першого тыждна продовжать тоту думку Божой всевідучости євангелійом о покликаню Філіпа і Натанаїла. Ісус кличе філіпа – подь за мнов! Філіп такой послухав. В його сердці горів огень любви а тым призваньом іщі веце ся роспалює. Філіп не зохаблять про себе, але звістує тоту новину Натанаїлови, котрый находив ся під фіґовым стромом. Но він на слова – мы нашли Месію, Ісуса із Назарета – реаґує стримано. Ці може быти із Назарета дашто добре? Філіп на нього: Подь і посмоть. А як Ісус го увидів, повів о нім: То справды Ізраільтян, в котрім не є фалшывости. На вопрос Натанаїла, одкы ня познаш, одповів, скорше як тебе Філіп закликав, я тя видів під фіґовым стромом. Нашто Натанаїл реаґує: Господи, ты Царь Ізраіля, месія.

Ісус выдав свідчіня Натанаїлови: правдивый Ізраільтян.. І нам суть адресованы тоты слова в тім постнім часі, жебы выхосновавші добрі тот час, учути: То правдивый хрістіан.

Перед Богом нич не є скрыте, ани людьске серце. Прото і наш піст най не буде лем поверьховый, але ідьме на глубину. Майме все Бога перед собов і памятайме на Його всевідучость, не лем в тім часі посту, але каждый день нашого жывота. Бо перед людьми можме собі насадити маску, но перед Богом не можеме. Так як знав задумы Юліана, так знать і нашы задумы, з котрыма дашто робиме, ці ся молиме або постиме. Слава Ісусу Хрісту!

В неділю, 8. марцa 2020 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 8. марця о 12.00 год. і 9. марця о 2.00 год. за русиньскым часом.

фото: Ікона перемогы Православя.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА