Словакы і Русины. Введіня до кірилиці. Майовы подіі Русинів в ЗША

На початок мая т.р. Карпаторусиньскє Общество в ЗША заміряло дві подіі повязаны з русиньском тематиком. Акциі рыхтуют поєдны одділіня орґанізациі, якы сут розміщены в ріжных частях Пілнічной Америкы. За стрічу присвячену порівнаню Русинів і Словаків одповідат одділ на Фльориді, а тоту про кірилицю проведе одділ в Клівленд (штат Огайо).

«Словакы і Русины: што нас лучыт і ріжнит» – під такым наголовком пройде стріча, яка одбуде ся 5. мая т.р. на Фльориді, поблиз міста Орляндо (Slovak Gardens, 3110 Howell Branch Road #100, Winter Park, FL). Вчас акциі зобраным буде высвітляний фільм бывшого предсідателя Карпаторусиньского Общества – Джона Ріґетті, знаного посліднім часом шырше як продуцента фільмів присвяченых русиньскым темам. Ріґетті є спілпродуцентом м. ін. двох документальных фільмів, достовірно вказуючых на дві траґічны подіі в істориі Лемків в ХХ ст., т.є. фільму Changed by Thalerhof/Перемінены през Талергоф (2014 р.) та продукциі під вымовным наголовком Even Tears Were Not Enough/Аж і слезы не старчыли, яка  премєру буде мала 28. квітня/апріля т.р. в Рускій Бурсі вчас першого дня упамятнінь 70. річниці акциі Вісла. По стрічы орґанізаторе просят на відеоконференцию, підчас котрой Джон Ріґетті буде одповідал на даваны му вопросы.

Другом з подій, яка пройде в неділю, 7. мая т.р., є акция рыхтувана на тему кірилиці, хоснуваной до ґрафічного запису русиньского языка. Тота стріча буде так само введіньом до азбукы, формом школіня. Справу представит модератор – поліґлота, якій народил ся в Европі і є хоснувательом азбукы. Стріча пройде ся бібліотеці в Пармі (2121 Snow Rd, Cleveland 44134).