Штуденты спознавають в пригранічу і Русинів. З розговорів будуть подкасты

В тых днях штуденты з Німецька, Польщі, Словакії і Україны подорожать в пригранічных областях, де спознавають історії голокавсту, ентнічных чісток ці примушеного пересельованя по Другій світовій войні.

В рамках проєкту In Between? бісідують з людми, котры такы дії іщі памятають і вытворять популарно-научны подкасты, якы будуть поясняти особливости приграніча в середньовыходній Европі.

Аґентуру TASR о тім інформовала Андреа Пучікова з Канцеларії Інштітуту памяти народа (Ústav pamäti národa).

6-ый річник проєкту має назву Neighbours meet in the borderlands  (Сусіды стрічають ся в пригранічу). Участници із штирьох країн были розділены на три ґрупы, в каждій ґрупі суть дві народности. Ґрупы ся выбрали до німецько-польского, польско-словацького і польско-україньского приграніча. Їх задачов є почас єдного тыждня зробити подкасты з бісідов о історії і жывоті людей з пригранічных теріторій. Записы розговорів будуть по закінчіню проєкту приступны на інтернеті.

В рамках проєкту участници научать ся робити баданя методов oral history, діґіталізовати архівы і робити фотоґрафічну документацію під доглядом фаховців з меджінароднов репутаційов.

Штудійна подорож по польско-словацькім пригранічу є подля Пучіковой принагодов на стрічу з людми, котры занимають ся охранов дідовизны, котра є на тій теріторії по Русинах і Жыдах. Участници мають почас свого тыждньового перебываня меджі Русинами навщівити Бардейов, Свідник, Осадне, Меджілабірці, Біч і Лося.

Почас тыждня зроблять розговоры з представителями містной справы, містныма актівістами і умелцями, котры утримують традіції реґіону. Тогорічный штуденьскый проґрам зачав у суботу 4-го септембра і закінчіть ся 11-го септембра. Орґанізує го Інштітут Европской сіті Память і Солідарность (European Network Remembrance and Solidarity).

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА