Шторічний лемківскій кєрмеш в Йонкерсі

Карпаторусиньскій Америцкій Центр «Lemko Hall» просит на свою шторічну подію «Лемківскій Кєрмеш», котрa традицийно проходит осіню. Тогорічний кєрмеш одбуде ся в неділю, 22. жолтня/октобра т.р., в Йонкерсі, штат Ню Йорк (1 Grace Avenue, Yonkers, New York 10701).

Як інформуют нашу редакцию орґанізаторы кєрмешу, вчас тогорічной його едициі окрем постійных атракций буде і дашто нове. В звязку з тым проєктуваны сут кошелькы, на якых найдут ся карпатскій медвід та карта Карпатской Руси з патріотичным гослом припоминаючым Русинам іх прекрасний язык та культуру. 

Як за пару попередніх років, на «Лемківскым Кєрмешы» заграт русиньскій ансамбль Vox Ethnika Band, котрий фунґує в ЗША. Чысло місц єст ограничене, зато орґанізаторы просят о скоршу резервацию, до 14. жолтня/октобра т.р. 

Йонкерс і його околиці являют ся по днес великым скуписком русиньской еміґрациі. То там на переломі XIX і ХХ ст. родила ся русиньска діяльніст серед товдышньой інтеліґенциі. Топонім Йонкерс в Старым Краю тямит ся як раз з Американьскым Карпаторускым Центром «Lemko Hall», якій по роках одраджат свою діяльніст.