Што нам оферуют поєдны орґанізациі?

Початок рока то добра нагода призріти ся на плян того, што нас жде в нашым лемківскым світі в Польщы протягом округлых дванадцетьох місяців. Більшіст проєктів і подій, якы реализуют поєдны орґанізациі, єст дотувана Міністром Внутрішніх Справ і Адміністрациі – список тых ініциятив явил ся такой кінцьом 2022 р.

Пізрийме лем на выбраны з вельох завнескуваных і позитивно оціненых ґрантодавцями, але самособом цікавых – як іде о культуровый, соспільный або языковый дискурс нашой нацийональной меншыны.

Зачнийме од того, што нове – кєд же тото може притягнути нашу найбільшу увагу. Стоваришыня Лемків, найстарша повыселенча лемківска орґанізация в Польщы, в 2023 р. зреализує проєкт під дост цікавом назвом – «Центр літературной і медияльной інформациі та екомузей лемківской етнічной меншыны». Тоту загальнорічну роботу буде вюл Кружок Стоваришыня Лемків в Пшемкові. Остаючы при Пшемкові – в рамках діяльности тамшынього одділіня орґанізациі зимовом пором (під конец грудня/децемвра) одбуде ся «Лемківскій Вертеп», значыт перегляд колядничых ґруп на чужыні. Місцевый ЛАПіТ «Ластівочка», діючый при Кружку, в 2023 р. выдаст нову платню під наголовком «Заспівали Ластівочкы».

Стоваришыня Лемків выдрукує і нову публикацию, хоц буде она лем другым выданьом споминів авторства Кірила Бреяна під назвом «Моя долга ІІ світова война». Книжка явила ся друком прешло 30 років тому, а тепер явит ся в одсвіженым форматі. Кірил Бреян то Ізбян, участник вересньовой кампаніі 1939 р., а пак вояк, якій з ґен. Владиславом Андерсом перешол цілый фронтовый шляк (до Польщы пришол з Анґлиі в 1948 р. – не вернул уж до рідных Ізб, а в околиці Ліґниці, де была переселена його родина; жена зас в 1940 р. пішла зо свойом родином на радяньску Украіну, пак по роках ся однашли і пришла жыти до мужа до Ліґницкого Поля).

Окрем новых проєктів Стоваришыня Лемків в текучым році буде дальше выдавало двомісячник «Бесіда», выдаст «Лемківскій Річник 2023», зрыхтує в серпни/авґусті 43. Лемківску Ватру на Чужыні і зорґанізує ХХХІ Лемківску Творчу Осін.

Серед новых публикаций Стоваришыня «Руска Бурса» в Ґорлицях находит ся выданя збіркы посвяченой сучасній ліриці лемківского/русиньского універсум та печатаня в рамках сериі Бібліотекы Руской Бурсы «Оповім Ти байку. Байкы Русинів і інчых народів» третьой части байок під назвом «Горошок Бобошок». Окрем того в рамках выдавничой діяльности выйде дальшый «Річник Руской Бурсы», першый і єдиный науковый лемківскій періодик.

Ґорлицкє стоваришыня серед постійных проєктів має м.ін. ведіня ансамблю Терочка, ведіня осередка лемківской культуры, якій містит ся в просторах історичной Руской Бурсы, та ведіня лемківского радия і інформацийного порталю lem.fm.

Музей Лемківской Культуры в Зындрановій, якій поінформувал о своім тымчасовым закрытю (більше чытайте ту), в 2023 р. хоче зорґанізувати артистичный пленер «На Лемковині» та выдати книжку посвячену пісням і співанкам од Святковы Великой. Окрем того зорґанізує дальшу пленерову подію «Од Русаль до Яна» (імпреза по пандемічній перерві вернула в 2022 р.), выдаст і наступне чысло свого музейного річника.

Призрийме ся тепер ЛАПіТ «Кычера», якій плянує продолжати каменярскы варштаты на памятковых лемківскых цмонтерах в Лабовій, Чырній і Кривій. Колектив хоче і печатати другу част опрацуваня посвяченого кореспонденциі Лемків до ЗША, Канады і Уруґваю в 1947-1948 рр. Згідно з опубликуваном інформацийом МВСіА, «Кычера» в 2023 р. має выдати першыраз свій річник під назвом «Царина». Ліґницкій ансамбль буде окрем артистичной і дослідничой діяльности орґанізувал м.ін. і наступну едицию фестівалю «Світ під Кычером».

Серед новых проєктів Стоваришыня «Лемко Тавер» зо Стшелец Краєньскых явило ся выданя публикациі під назвом «Фай по свому – дознай ся, выраз себе, подай дале». Окрем інчого зорґанізує в Лугах фестіваль 33. Лемківска Ватра, якій проходит в липци/юлию.

З пулі фінансів перезначеных на розвиток лемківской етнічной меншыны в текучым році своі задачы будут вести і даякы меньшы підметы. Приміром Фундация Стара Дорога хоче продолжати проєкт Лемколянд і выдати едукацийну книжку для діти. Нова ініциятива явит ся од церковного общества – Братство Грекокатолицкой Молодежы «Сарепта» зреализує в рамках дотациі МВСіА VIII Медженародный Фестіваль «При Джерелах».

То лем част проєктів і подій, якы ждут нас в 2023 р. Віриме, же вшыткы будут направлены на добро і розвиток лемківской меншыны, а внет будеме мочы видіти результаты першых з них.