Што мают спільне Варголь, Далі, Пікассо з LEGO?

Можливе, што король попкультуры Енді Варголь ани не думал, што його слава досягне каждой сферы штоденного жытя. Был уж лицьом курєрской фірмы, тепер може стати ся модельом для фіґурок найславнійшых кльоцків світа.

Неє бодай такой особы на світі, котра не знала бы кльоцків LEGO. Любителі датскых чачок не можут нарікати на малый выбір кльоцків, але найновшый проєкт може захопити не лем любителів кльоцків, але і штукы.

Каждый може выдумати своє LEGO

LEGO Ideas то сайт, через котрый любителі кльоцків можут зголошувати своі думкы на колекциі. Творці з цілого світа можут творити прототипы фіґурок, а інтернавты голосуют на тоты, котры ся ім видят найбільше цікавы. На тот момент найвекшым заінтересуваньом тішат ся тоты, котры представляют найславнійшых артистів ХХ стoлітя, найдеме серед них Енді Варголя, Пабля Пікассо, Сальвадора Далі ци Фріду Кальо.

Дізайн фіґурок выдумал Ган Сбрікстін. Запроєктувал він цілы пакєты, котры образували бы студийо творців, іх малюнкы і роботу.

Ци Варголь трафит до світа LEGO?

Коли проєкты з LEGO Ideas достанут 10 тисячы голосів, трафлят до фірмовой комісиі, котра оцінит, ци вартат іх выпродукувати. В комісиі засідают дізайнеры, менаджеры і інчы важны датской компаніі. На днес, 3. вересня/септембра 2019 р., артисты ХХ столітя мают уж більше як 6700 голосів, а голосувати мож іщы через 326 днів. Mож згадувати, што Варголь, Далі і решта трафлят під роздумуваня шефів LEGO.

Пакєт Енді Варголя інспіруваный є його артистичном Фабриком. Мож досмотрити ся штырьох портретів Мерилін Монро, портрет Ельвіса Преслі, образы з баньками поливкы Campbell, самы банькы Campbell’s Soup, дві скриночкы Brillo, дві поляройдовы знимкы, дві фільмовы пушкы, срібну хмару (студийо Варголя было выложене алюміньовом фолийом) та дві окладинкы платен його проєтку: The Rolling Stones «Sticky Fingers» та дебютантского кружка Velvet Underground.