Школярі підуть стежками русиньскых предків

Русиньска оброда на Словеньску – Містна орґанізація РОС в Меджілабірцях на тот рік приготовила проєкт про школярів основных школ в Меджілабірцях, котры ся вчать русиньскый язык під назвов Стежками русиньскых предків.

Орґанізація такым способом хоче школярям приближыти русиньску історію і приготовити їм інтересный проґрам, котрый збогатить їх навчаня.

Уж тоту пятніцю, 25-го юна 2021-го року, є приготовлене перше із путовань школярів, котры підуть за історійов предків села Чертіжне. Участны навщівлять памятну русиньску ізбу, де будуть мати історічну лекцію, посмотрять ся на цінтерь, де суть похоронены вызначны русиньскы діятелі Адолф і Віктор Добряньскы ці Юлій Ставровскый-Попрадов. Так само посмотрять собі і містный ґрекокатолицькый храм, а приготовлены суть про них і короткы забавно-едукачны актівности в русиньскім языку.

На септембер ся приготовлює путованя за історійов князя Лабірця до Габуры, де діти навщівлять памятник князя, але і православный деревяный храм. З русиньсков писательков Меланійов Германовов будуть бісідовати о історії Русинів а на містнім гріску їх будуть чекати і шпортовы актівности.

В октобрі бы мали іти до Сниньского окресу за історійов сел Тополя і Осадне. В родиску Александра Духновіча оддають честь будительови коло його памятника і будуть їм вказаны ремеселны выробкы. В Осаднім підуть посмотрити до кріпты вояків з 1-ой і 2-ой світовой войны, а драгов назад посмотрять собі і деревяный храм в Уліч-Кривім.

Русинська оброда на Словеньску орґанізує проєкт Стежками русиньскых предків вдяка підпорі з Фонду на підпору културы народностных меншын.

Жрідло фотоґрафії: Wikipedia.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА