Шефом КОТР Северовыход Словакії став Михал Ільканин

Як інфомровала Барбора Чехова з Крайской орґанізації турістічного руху (КОТР) Северовыход Словакії, 30-го марца 2023-го року одбыла ся вална громада орґанізації, котрой зряджовательом є Пряшівскый самосправный край. На ній быв выбратый і новый председа, якый вычеряв Михала Сікору.

Од 1-го апріля є шефом КОТР Северовыход Словакії Михал Ільканин. Того часу є і у функції предносты Окресного уряду в Свіднику, а так само є незалежным посланцьом Пряшівского самосправного краю (ПСК). В попереднім періоді быв і містьскым посланцьом у Свіднику, но в остатніх выборах на тоту функцію не кандідовав.

Перед політічнов карьєров быв Михал Ільканин довгорічным членом драматічного колектіву Театру Александра Духновіча в Пряшові, появив ся і у філмах, а публіка го могла знати і як модератора русиньскых подій, наприклад і свідницького Фестівалу културы Русинів Словакії.

Мать мотівацію працовати

Михал Сікора быв председом КОТР Северовыход Словакії од марца 2014-го року. По закінчіню мандату посланця ПСК вырішыв наповно занимати ся роботов старосты села Штырба і турістічным рухом у Высокых Татрах.

Председа ПСК Мілан Маєрьскый подяковав Сікорови за майже десять років роботы у функції і за довгорічны актівности про розвиток турістічного руху в Ппряшівскім краю.

„У 2019-ім році до нас пришло 1,1 міліона навщівників, котры ся уквартельовали, котры в краю схосновали різны службы, што має ефект на много областей жывота,“ повів Маєьркый, котрый припомянув, же в періоді шефованя Михала Сікоры ся подарило зреалізовати множество актівностей на пропаґацію краю.

„Мій попередник за 10 років зробив фалат доброй роботы. Положыв фундаменты і розумно вів фунґуючу орґанізацію, котра за тот період пришла з барз файныма ідеями, якы і зреалізовали ся. Зато маю о то векшу мотівацію працовати, будовати на тых фундаментах так, жебы в области турістічного руху не рушала ся допереду лем КОТР, але вєдно цілый край,“ повів нововыбратый председа орґанізації Михал Ільканин.

Новы візії і підпора авіатранспорту

Членове КОТР на валній громаді рішыли і вопрос далшого розвитку турістічного руху в Пряшівскім краю.

„Важным інштрументом розвитку турістічного руху є і підпора авіатранспроту. Пряшівскый самосправный край хотів бы ся веце анґажовати в тій темі, тісніше і фокусовано співпрацовати з Аеропортом Попрад – Татры. Ціль є одкрыти ся веце загранічу, звекшыти навщівность і доступность краю,“ повів жупан Маєрьскый.

Заанґажованы в турістічнім русі добісідовали ся на выпрацованю візії і стратеґії тырвало утримательного розвитку турістічного руху в Пряшівскім краю.

Пряшівскый край є третій найвеце навщівльованый край Словакії. Меджі словацькыма турістами є другым найоблюбленішым. У 2022-ім році ся в нім уквартельовало 888 970 навщівників. В поріваню з роком 2021 тото чісло наросло о 69 процент. Перед пандемійов, у 2019-ім році, было тото чісло іщі высше, кедь в Пряшівскім краю уквартельовало ся аж 1 108 000 турістів.

Фото: www.severovychod.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА