Шеф загранічных Словаків навщівив у Сербії і Русинів

Од 12-го до 17-го апріля 2021-го року проходить робоча навщіва председы Уряду про Словаків жыючіх в загранічу, Мілана Яна Піліпа, у Сербії.

Председа загранічных Словаків почас тых днів навщівлює місця, де жыють сербскы Словаци, має стрічі зо словацькыма обществами діючіма у Сербії, Націоналным совітом Словаків ці представителями церькви.

Кедьже Мілан Ян Піліп є походжіньом Русин, і є довголітнім актівным діятельом у русиньскім русі на Словакії, хоць в рамках неофіціалного проґраму, но предці лем навщівив і свою комуніту Русинів, котры у Сербії жыють.

Шеф загранічных Словаків у середу 14-го апріля навщівив, вєдно із заступником амбасадора Словакії у Сербії, Іґором Венцелом, Руськый Керестур, найвекшый центер войводиньскых Русинів.

Як інформовала аґентура Рутенпрес, вєдно із домашньов – Оленов Папуґа, котра є членом Націоналного совіту Русинів і державным секретарьом Міністерства про людьскы права, права меншын і соціалный діалоґ, Мілан Піліп із свойов делеґаційов навщівив у Руськім Керестурі Школу Петро Кузмяк, де є основна школа і ґімназія. Директорка школы Наталія Будински гостів познакомила з тым, як фунґує школа, котра має навчалный язык русиньскый, од своїх початків аж доднесь.

Піліп навщівив і Націоналный совіт Русинів, де го привітав председа той самосправной інштітуції Борислав Сакач.

Навщіва гостей далше продовжовала в Катедралнім соборі св. отця Николая в Руськім Керестурі, де їх привітав домашній парох о. Михайло Малацко. Тот гостям розповів о історії приходу Русинів до тых країв, але і о історії парохії. Гості собі посмотрили і кріпту, де суть похоронены єпіскопи. Піліп собі посмотрив і маріяньске путницьке місце Водіця.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА