Шеф порадців Гройсмана: Русины існують. Мам русиньске коріня

Іван Міклош, вызначный словацькый економ, бывшый словацькый міністер і підпредседа влады русиньского походжіня ся у новій владі Володиміра Гройсмана став шефом порадців премєра. Як порадця на Міністерстві фінанцій Україны робив вже довшый час. У новій владі му было понукнуто і кресло міністра фінанцій, но условії, же міністер мусить мати україньске гражданство, Міклош не быв способный сповнити.

Приятьом україньского гражданства бы стратив тото словацьке, што Міклош і про словацькы медії веце раз повів, же бере за основный проблем того, жебы досправды став ся міністром на Україні, кідьже словацьке гражданство брав за свою пріоріту і не хотів о нього прийти. Перша влада Роберта Фіца в роках 2006 – 2010 зачала одоберати гражданство тым, котры здобыли гражданство іншой державы. Была то словацька остра реакція на мадярьску леґіслатіву, котра уможнила роздавати гражданство загранічным Мадярям.

Міклош але і так продовжуе свою роботу на Україні, де є вже веце як місяць шефом продаців премєра Гройсмана. Із той нагоды з ним україньскый портал НВ Бізнес зробив інтервю, в котрім ся редактор Іван Верстюк опросив і на Міклошово походжіня.

Верстюк ся Міклоша опросив ці є правда, што ся пише у Вікіпедії, же має україньске коріня. Міклош оправив редактора, кідь повів:

„Кідь мам быти точным, маю русиньске коріня. На Україні є приято думати, же окремый русиньскый етнос не існує, но в реалности він існує. Я єм ся народив на северовыходній Словакії, де як раз і жыють Русины. Комуністічна Чехословакія не вызнавала Русинів як етнос, зато ся вшыткы Русины брали за Українців. У документах моїх родічів было зазначено, же суть Українці. У тім вопросі є іщі єден аспект – реліґійный. Мої родічі были ґрекокатолилами, але комуністы заказали Ґрекокатолиьку церьков, офіціално дозволили лем російске православя. На початку 1990-тых років люди наконець дістали право вырішовати – ці суть Русины ці Українці, ґрекокатолици або православны. Векшына навернула ся до свойой русиньской ідентічности і ґрекокатолицькой віры. У тій векшыні і мої родічі,“ поясньовав у інтервю Міклош.

Припоминаме, же Іван Міклош у 2011-ім році коло перепису населіня записав собі русиньску народность. В кампані перед переписом дав своє выголошіня русиньскым орґанізаціям о своїм русиньскім походжіню і о тім, жебы ся люди голосили ку своїй народности. Тото выголошіня было выдруковано на плаґатах, котры ся дістрібуовали міджі людей.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА