Шатра перед сідибом Державных Лісів. В обороні карпатскых величавых дерев

Активісты Ініциятивы Дикы Карпаты зачали протест перед сідибом Реґіональной Дирекциі Державных Лісів в Коросні. Протестуют в обороні найстаршых карпатскых величавых дерев.

В понедільок 28. серпня/авґуста тр. при будинку Реґіональной Дирекциі Державных Лісів станули два туристичны шатра. В найблизшых днях будут схороніньом для парох осіб звязаных з Ініциятивом Дикы Карпаты. Члены той ґрупы спілдіяли з Ініциятивом Дикы Карпаты, котра од веце як двох років блокувала вытинку Карпатской Пущы і котру насильно зліквідували 13. серпня/авґуста.

«В одповіди на евікцию блокады і схоснуваны взглядом активістів репресиі од парох тыжнів одповідаме ріжныма акциями. Зато по блокаді вытинкы в выділіню, зрывкового трактора і Надлісництва Бірча намагаме ся піти іщы дале» – пояснюют представникы ґрупы.

В минулый понедільок передали директорови Реґіональной Дирекциі Державных Лісів (РДДЛ) Марекови Марецкому і його заступці Янови Мазурови петициі «В обороні найстаршых карпатскых дерев», котру підписало веце як 22 600 осіб.

Петиция: Державны Лісы повинны хоронити лісы

«В рамках заряджаня нашым спільным добром Державны Лісы сут зобліґуваны до охороны лісів. А єднак трактуют тоты красны, віковы дерева як предметы, котры можна замінити на грошы. Окрадают в тот спосіб будучы поколіня з можливости перебываня зо старыма деревами і марнуют потенциял лісництва до реальной борбы з наслідствами климатичной кризы. Через своє короткозоре діяня деґрадуют природничы жытлиска і зменшают біоріжнорідніст» – чытаме в петициі.

Ініцияторы петициі пропоминают, што вытинка старых лісів нарушат ретенцийонуваня воды в краєвиді і спричынят передаваня великой кількости CO2 до атмосферы. Появляючы ся на місци старых дерев молоды не сполняют тых функций. Чысло вытинаных дерев фурт росне.

Неє в лісах старых дерев?

Авторы петициі припоминают, што некотры надлісництва, як напр. Красічын, заплянували вытяти того рока 262 дерева, штыріраз веце як рік тому.

Чым сут дерева о памятниковых вымірах? То стары дерева, котры осігают окрисленый розмір стебла. Ялиця стає ся памятником, коли осагне 250 цм обводу, бук – 300 цм, черешня – 250 цм, граб – 200 цм.

Пресовый представник РДДЛ Едвард Маршалек повіл, што тзв. памятниковый вымір в нашым реґіоні ялиці осігают в віку 90-100 років. «Через тото не чыслят ани єдного столітя і такых дерев є в нашых лісах соткы тисячів. Сам вымір не рішат о тым, ци дерево має статус памятника природы. В выбраных примірах, напр. з огляду на публичну безпеку ци з огляду на охорону, при схоснуваню особливой процедуры, дерева вызначаны сут до вытинкы. Такых примірів в скали рока нотуєме парудесят до парусот в цілій РДДЛ» – поінформувал Едвард Маршалек.

Активісты з Ініциятивы Дикы Карпаты апелюют в петициі, жебы стары дерева оставали в лісі до натурального розкладу. Припоминают, што вчас стіганя з ліса великых дерев безповоротні нищыт ся підстілку і верхню верству ґрунту. Орґзанізаторы протесту домагают ся тіж, жебы перестати вытинати дерева і будувати дорогы під стіганя стятых дерев на обшыри плянуваного Турніцкого Нацийонального Парку, а особливі на обшыри проєктуваной сіти резерватів Реліктова Карпатска Пуща. Хотят тіж, жебы утворити резерваты в отулині Бєщадского Нацийонального Парку.

«Обіцювали уж вельо. Ждеме на ясну і прецизийну одповід, без опізнаня» – бесідує єдна з протестуючых осіб.

Вшытко через імелю

Ян Мазур в бесіді з активістами передаючыма петицию ствердил, што неправдом є, же Державны Лісы смотрят на дерева як материял на дошкы. Припомнул, што коли корник знищыл смерековы лісы, так тепер інвазия імелі може неодолга здесяткувати стары дерева на великій обшыри і загорозити тырвалости ліса через поражыня молодого поколіня імельом.

Ян Мазур спостерюг, што в опрацуванях Американів Підкарпатя окрисляне є Амазонійом Европы. І, як ствердил, діє ся тото завдякы ґаздуваню лісників.

Шефове РДДЛ обіцяли, што неодолга однесут ся до петициі і жадань протестуючых.

Фот. www.terazkrosno.pl