СФУЛО ці СБУЛО?

Світова федерація українських лемківских об’єдань (СФУЛО) штораз веце доказує лем єдно. Днесь їх діялність не є основана в етнічнім возроджіню Лемковины, розвитку і популарізації окремой духовной і матеріалной історії і културы Русинів (Лемків), хоць в проукраїньскім напрямі, як то мають і на своїм сайті, але в тім, быти пятов колонов, тройскым коньом міджі Русинами, котрый не мать іншой роботы, лем атаковати вшытко, што одмогать ся україньскій фалсіфікації о історії Русинів і помагати к дештуркчным намагам о заставліня штораз веце очівіснішого зновувозроджіня Русинів.

Не даремно ся бісідує, же потурченый є гіршый як Турек. Тоты слова суть на сто процентів чінны і в припаді СФУЛО. Уж минувшого року „ініціатівна“ федерація загнала і публіковала у своїм „Віснику“ писмо, в котрім мали велику потребу діштанцовати ся од Світового конґреса Русинів, якый проходив на Україні а вєдно з тым орґанізації, котры суть в складі федерації, кликали „Службу беспеки України“ (СБУ), жебы контрольовала русиньскый рух, бо тот хоче лем розбивати Україну. Люди, котры мають інтеліґенцію холем середньой уровни, кідь з дачім не суть согласны, так то просто іґнорують і не беруть на тім участь. Навеце, кібы хотіли быти обєктівны, публіковали бы і резолуцію Світового конґреса Русинів і вказали окремы пункты, котры в тій резолуції мають діяти проти Україні. Лемже, самособов, такы пункты бы не нашли. Яка є потреба публічно діштанцовати ся і кликати на русиньскый рух беспечностну службу є може на першый погляд незрозуміла, но такой на тот другый ясна. Потурченый гіршый як Турек. СФУЛО про своє ідеолоґічне існованя не потребує розвивати културну дідовизну Русинів, але вказати, же мы ліпшы Українці, як тоты досправдовы а вєдно з тым заборонотити тому найосновнішому пункту, по котрім кличе і конґрес, значіть вызнаню русиньского народа на Україні. Тадь такый прецеденс бы міг важні пошкодити проукраїньскы роздумуючім Русинам – Лемкам. Што кібы хтось наголос пак і о них повів, же і они Русины а з образу о найвірнішых із Українців бы зістав лем рам?

Не перешов ани рік а в писаню „лібесбріфів“ до „Служби беспеки“ СФУЛО продовжує дале. Што є на тім найліпше, публікує нелем своє писмо, але і одповідь СБУ. То є якбач єдиный смішный момент цілой траґікомедії. По перше, не знам, котра інша орґанізація (навеце неполітічна, недержавна) бы публіковала, же комунікує з тайнов службов даякой державы і по друге, публікованьом одповіді СБУ роблять з „утаєной“ роботы беспечностной службы так невидительне діло, як є хыбаль величезный кратер в америцькій пустыні по двотоновім впавшім метеоріті.

В передостанім чіслі „Вісника“ СФУЛО знова публіковала писмо. Знова просять і СБУ, жебы діяла. Причінов мало быти писмо Петра Ґецька, котрый просив руського презідента о „поміч“. К писму Ґецька ся знова выражати не буду. Тот тяг поміг якбач лем неславной популаріті єдного чоловіка, але доіста не поміг Русинам, на котрых вдяка тому пропаґанда нашла далшу причіну, чом не вызнати Русинів на Україні. Тадь суть то ворогы державы. Основный проблем бы єм не видів в тім, же хтось хоче діштанцовати ся од того писма, сам ся діштанцую. Вопросом є, ці на діштанцованя треба кликати СБУ, або просто написати выголошіня. Далшым вопросом є, чом СФУЛО маніпулує з інформаціями, кідь в далшых речінях писма не бісідує лем о авторови писма, але вказує на то, же карати треба цілый русиньскый рух на Закарпатю, бо він є „цілый підтримованый робітниками тайных служб Руськой федерації…“ Такы выголошіня не суть ничім іншым, як маніпулаційов і пропаґандов. Якбы СФУЛО не хотіла маніпуловати, і хотіла бы быти обєктівна, інформовала бы і о тім, же в звязку зо вшыткыма подіями, котры теперь проходять на Україні, існує і выголошіня Євгена Жупана, головы Народной рады Русинів Закарпатя, котра зъєдинує векшость русиньскых орґанізацій на Закарпатю, і в котрім ся ясно пише, же Народна рада ся діштанцує од закликів Ґецька, же є за мірне рішаня сітуації а єдине, што хоче, то є вызнаня Русинів так, як тому є і в іншых цівілізованых державах Европы. То але не є нич сепаратістічне, ани протиукраїньске. Также якый цілый русиньскый рух а яка робота руськых тайных? Самособов, така інформація бы не сіділа до образу, котрый СФУЛО цілый час малює, также маніпулачнов селекційов інформацій каламутить федерація дале головы своїх приверженців. Схізофренія пані Федины і єй колеґів, котры суть і Русины і Українці, подля того, як то выходить ліпше в даній сітуації, але якось не є цілком під їх контрольов, бо в тім самім чіслі публікують Декларацію Світового конґреса Русинів, того конґреса, на котрый минуле літо кликали таксамо СБУ, і котрый основно пише тото саме, што пише і Народна рада. Як могли зробити таку хыбу і публіковати „неприятелів“ власти? Якбач зато, бо досправдовый русиньскых рух не є кріміналным рухом, як ся то намагають в СФУЛО выображати. І то потверджує як Світовый конґрес, так і Народна рада. Але то не є єдиный припад схізофренії і маніпулації СФУЛО. Бо тота сама федерація і орґанізації, котры до ній входять, все як є потрібне дати десь кількость популації, не рахують лем „своїх“, значіть тых, котры ся голосять к Українцям, але рахують довєдна із Русинами, котры ся поважають за окремый народ і од котрых СФУЛО давать рукы гет і кликать на них СБУ. Маніпулація і фалсіфікація, ктора выжадує схізофренію, здравый чоловік того негоден, то сістема роботы тых орґанізацій.

Самособов, СБУ своїм возлюбленым співпрацовникам одповіла, позітівно, а, як єм вже спомянув, СФУЛО то опубліковала в останім чіслі свого „Вісника“. До складу СФУЛО днесь, якбач з вынятком Україны, де українізація не Лемках зробила фалат „доброй“ роботы, входять орґанізації з іншых держав, котры бы в моменті, коли бы зо свойой назвы дали гет слово „Русин“ або „Лемко“ стратили і тоту решту членьской базы, котра їм по новім возроджіню окремого русиньского народа іщі зістала. Лемже они днесь не роблять на благо Русинів, лем продовжують в роботі, котра была започата комуністічным режімом і котра є проти Русинам. СФУЛО і орґанізації, котры в ній беруть участь суть досправдовы тройскым коньом, люди, котры бы нелем хотіли быти ліпшыма Українцями як самы Українці, але днесь ся не боять сягнути по хоцьякім средстві, жебы то доказали собі і Київу. Честне бы од них было, покля ся діштанцують од русиньского руху, жебы з назвы своїх орґанізацій дали слово Русин, ці Лемко гет. Лемже то бы были вже лем україньскы орґанізації, котры бы в многых державах днесь были в тоталній декаденції. Навеце, пропала бы їм так выгодна позіція пятой колоны, котра внутрі Русинів намагать ся робити то, што ся не дарить іншым – контрольовати і холем дакус гамовати днесь вже ясне і незвернутельне возроджованя Русинів у світі, котры собі усвідомлюють, же суть унікатным, окремым народом зо своїм языком, културов, традіціями і історійов. Лемже пак стоїть вопрос так: Творять тоты орґанізації іщі „Світову федерацію українських лемківских об’єдань“, значіть СФУЛО, котра має розвивати і популарізовати окрему духовну і матеріалну історію і културу Русинів (Лемків), хоць в проукраїньскім напрямі або творять „Службу беспеки українських лемківских об’єдань“, значіть СБУЛО, котра не робить нич інше, лем то, же ся намагать зо вшыткых сил заборонити тому, жебы Русины дізнали ся, же суть Русинами і діскредітують так Русинів, котры іншак мають тоту саму кров, што они, лем нарозділ од них комуністічный блуд о Русинах-Українцях неприймають і ниґда неприймуть?

І… лем так міджі нами: Што на то державны уряды окремых держав, де суть орґанізації, котры входять до СФУЛО зареґістрованы, же тоты орґанізації комунікують з тайнов службов іншой державы?

Петро Медвідь, Пряшів

(Статя была написана як коментарь „Вступне до контроли“ лемківского радіа lem.fm)

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА