«Серенча» заповідат свою нову платню

Серенча то ансамбль, котрий на лемківскій сцені выступує уж долший час. Через вшыткы рокы свого істнуваня заграла вельо концертів, выступуючы по цілым світі. Од основаня в 1997 р. выдала три (бо была тіж демо-касета) офіцияльны альбомы Під облачком (2004), Зеленым гадвабом (2007) і Поза гумен (2012).

Серенча заповіла уж нову платню пн. Ой ле лем. Як заявлят сайт ансамблю, тот момент, коли познаме полний зміст 11 творів, надыйде неодолга. Знаме, же при граній Серенчом музыці мож і гуляти, і співати, і задумати, выслухуючы поєдны фразы. Ой ле лем буде ся складала з лемківскых пісен, котры подібні на попередніх кружках, будут навязувати до давных, мало знаных творів. Ансамбль своі аранжациі операт на співнику Филарета Колессы з 1929 рока, котрий зобрал пісні з околиц Панкны, Маластова і Устя Руского.

Вєдно з печатаньом нового кружка, Серенча запрезентує тіж свій новий теледиск до співанкы Ой ле лем. Проведены в листопаді/новембрі т.р., награня, зниманы были на Лемковині – в Бліхнарці і Высові. За тым мотузком можете пізрити на знимкы з пляну.

Кєд лем буде доступна до придбаня нова платня лемківского ансамблю Серенча – заявиме о тым на нашым портали.