Серенча на Святі Народного Чачка

Ци молоды Лемкы знают окрем ляльок-мотанок, або рукоділ зо сіна даякы інчы народны чачка?  Кєд ніт – в перший вікенд червця в Стришаві буде нагода, жебы тото змінити. Стришава – місцевіст, яка находит ся в Жывєцкым Бескіді і знана єст з творіня деревяных забавок, уж девятнадцетий раз остане на пару дни центром народных чачок, в звязку з орґанізуваным гын Святом Народного Чачка.

Ідейом того свята єст промоция і популяризация локального культурового дідицтва, якым єст вырабляня чачок, а тіж формуваня привязаня діти і молодежы до родинной і реґіональной традициі. Рік-по-рік, темом Свята сут інчы чачка, напр. возы, пташкы, коникы та інчы, а імпрезі товаришит вельо конкурсів – на найліпше зроблене чачко, конкурс зо знаня о істориі чачкарства, на співанку о чачках, та вельо інчых. Окрем того, на сцені презентуют ся реґіональны ансамблі, а попри святі проходит великій ярмак народной штукы і артистычного рукоділа.

Темом тогорчного Свята сут деревяны райскы пташкы, а єдном з музычных атракций буде выступ лемківского фолькового ансамблю Серенча з Ґорлиц.

Орґанізатором фестівалю єст Уряд Ґміны Стришава та Бескідскій Центр Народного Чачка в Стришаві.