Sanctus Urbanus – фестіваль сакральной музыкы при лемківскій поезиі

Уж од найблизшой неділі, 16. грудня/децембра, в зеленогірскых храмах вызвучыт сакральна музыка в рамках ІІ Фестівалю Сакральной Музыкы Sanctus Urbanus. В рамках тогорічной едициі пройдут три концерты. Не єдным з них явит ся поезия Петра Мурянкы.

Перший з конертів – інавґурацийний – пройде уж в найблизшу неділю. Найперше од 14.00 год. в тамтышній грекокатолицкій церкви Покровы Пресявотой Богородиці, яка находит ся днес в місци, де колиси была популярна зеленогірска винярня. В проґрамі вызвучат такы творы як Зима Антония Вівальді, Колысанка Нововєйского, Hark the Herald Angels Мендельсона. Творы выграны будут артистами з Вроцлавя, Зеленой Горы та Монтреалю. Музыці товаришылa буде поезия барда Лемковины, Петра Мурянкы.

В тот же ден пройде іщы другій концерт пн. Sanctus Urbanus ora pronobis. О 17.00 год. в римокатолицкій конкатедрі св. Ядвіґы Шлезской вызвычут музыка посвячена покровительови міста Зелена Гора – св. Урбанови.

Фінішом фестівалю буде «адвентовий» концерт, якій пройде в середу, 19. грудня/децембра в костелі св. Брата Альберта. В проґрамі находят ся творы такых композиторів як Бах, Коралі і Вівальді. В християньскых храмах ріжных віроісповідань тырват як раз передріздвяний час, прото не бракне і коляд.

Як дознаєме ся од орґанізаторів, фестіваль презентувал буде не лем высоку музычну вартіст, але і богату культуральну і реліґійну спадковину міста, понеже буде проходил в в забытковых обєктах Зеленой Горы. Од зламу 40/50 рр. ХХ ст. культуру міста творят і Лемкы, якых предкы были выселены з Карпат.

За орґанізацию фестівалю одповідат знаний во світі гушляр лемківского походжыня, др Мариюш Мончак. В рамках свойой діяльности веде фунадцию Ars Activa, яка шторік рыхтує медженародний Музычний Фестіваль «При джерелах», якій одбыват ся на Лемковині.