Ришард Ґалля порадником маршалка Сойму до справ нацийональных і етнічных меншын

Маршалок Сойму Шымон Головня покликал бывшого посланця Ришарда Ґаллю на свого порадника до справ нацийональных і етнічных меншын. «Ріжниці, ріжнорідніст нашых языків, культур, віроісповідань сут нашом силом, а не слабістю» – підкрислил Головня.

Ришард Ґалля то єден з лідерів німецкой меншыны в Польщы. В Соймі засідал в роках 2005-2023.

Дорадця до справ Нацийональных і Етнічных Меншын то цільком нове становиско, котре было рішене перед даякым часом по проведеных консультациях Маршалка з представниками нацийональных і етнічных меншын.

Три кандидатуры

Поєдны меншыны зголошували своі кандидатуры, а пак Спільна Комісия Уряду та Нацийональных і Етнічных мала запропонувати Маршалкови свій выбір. Меншыны зголосили три особы: проф. Олену Дуць-Файфер, Ришарда Ґаллю і Григория Куприяновича, спілведучого Спільной Комісиі Уряду та Нацийональных і Етнічных Меншын. Oстаточно на тоту посаду был запропонуваный представник німецкой меншыны.

Вчас вчершанього акту Головня підкрислил як барз важне є достерігати нацийональны і етнічны меншыны та потребу піднести до ранґы державной справы права тых меншын. «Ріжниці, ріжнодірдніст нашых языків, культур, віроісповідань сут нашом силом, а не слабістю. Сильна держава все повинна так думати о нашій ріжнорідности» – повіл маршалок Сойму.

Звернул увагу, же то першый раз од років, коли в польскым Соймі не засідат представник нацийональных меншын. Одтале – додал – думка, жебы то маршалок Сойму покликал свого порадника до справ нацийональных і етнічных меншын – так, жебы во спілпрацы з орґанами Сойму нацийональны меншыны мали влияня на творене в Польщы право.

Почути голос меншын

Головня пояснил, што Ґалля был выбраный в голосуваню при присутности представника маршалка Сойму. «Пан посол Ришард Ґалля здобыл 12 зо 14 голосів, представникы ріжных нацийональных меншын підперли го, же то як раз він, як бывшый парляментариста, найде ся в тій роли (…), репрезентуючы вшыткы нацийональны меншыны, не лем німецку, з котрой походит» – повіл Головня.

Головня поінформувал, што на ново рушыли роботы Спільной Комісиі Уряду та Нацийональных і Етнічных Меншын. Маршалок просил новопокликаного порадника і присутных на акті членів СКУтНіЕМ о поміч выпрацувати механізмы, котры «дозволят почути голос нацийональных і етнічных меншын в системовый спосіб, а не лем ad hoc».

Ґалля повіл, што єст гордый, же буде міг продолжати свою роботу для меншын в Канцеляриі Сойму. Додал, што через 16 років был спілведучым СКУтНіЕМ. Додал, што покликаня го на дорадцю через маршалка Сойму єст «добрым початком, світлом в тунели», кєд іде о можливы зміны уставы о нацийональных і етнічных меншынах.

Фот. sejm.gov.pl