Рыджаво і смаковито – вікендове Свято Рыджыка на Лемковині

Заран, на вікенд 1. – 2. жолтня/октобра т.р, на Лемковині зачне ся высівскє Свято Рыджыка. То уж 9. едиция той подіі, котра рік-по-рік проходит осінньом пором в місцевости Высова і другых околичных селах. Вікендове Свято Рыджыка, орґанізуване Старым Здройовым Домом, то єдина така подія на Лемковині, адресувана до вшыткых любителів збераня грибів і смакошів рыджыковых страв. А лемківска земла любит нас дарити грибами, хоц сут і рокы неуроджаю, але тоты, што поколінями трудят ся іх збераньом, все находят дашто на своім грибовиску.

Поінчы рокы лемківскы акценты свята проявляли ся хоц бы в выступлінях нашых ансамблів. Но, тот рік єдиным, але бодай найважнійший акцентом, є факт, же подія просто проходит на нашій земли. В проґрамі заплянувано в перший ден з самого рана полюваня на рыджыка, т.є. збераня той одміны грибів в околичных лемківскых лісах. З того, што ся назберат, одбудут ся кулінарны конкурсы, в котрых тиск буде кладений на стравы з рыджыків. Подіі будут проходити і в поблизкій Бліхнарці, котра граничыт з русиньскыма селами по словацкій стороні – Стебницком Гутом та Вышнім Тварожцьом. В рамках свята пройде і выстава фотоґрафій, презентуючых красу Низкого Бескіду, а то значыт – красу нашой Лемковины. Проґрамовий зміст подіі зберігат в собі вельо рукодільных варштатів та і інчы акциі, про котры чытайте за мотузком.