Рутенія на выході Словакії представить Землю обіцяну

Русиньскый Фолклорный ансамбель Рутенія з Братіславы ся почас осени представить на выході Словакії із своїм найновішым проґрамом, котрый дістав назву Земля обіцяна. Іде о танечно-драматічну інсценацію, в рамках котрой можете видіти на сцені і познаты твари акторів.

Остатній раз робила Рутенія подобне турне на выходній Словакії з проґрамом Русиньске сердце у 2016-ім році.

Іншпірованы оптаціями

Інсценація Земля обіцяна мала свою премєру в попереднім році, но концепчно пєса зачала рихтовати ся омного скоріше.

Земля обіцяна приближує публіці дії, котры в Чехословакії проходили по Другій світовой войні. Іде о такзваны оптації, в рамках котрых ся тісячі людей, головно русиньской народности з выходной Словакії, на основі лживой пропаґанды добровольно приголосили выселити ся на теріторію Совітьской Україны. Своїм підписом і перекрочіньом граніць пришли о свій маєток, чехословацьке гражданство, але на україньскій теріторії їх не чекав рай, о котрім їм аґітаторы бісідовали, і которму хотіли віровати. Наопак, чекав їх векшынов омного тяжшый жывот як дома, нераз діскрімінація ці перзекуції. Но нихто з них не доказав забити в собі надію, же раз вернуть ся домів. Першы реоптанты зачали вертати ся в 1960-ых роках, тоты остатні, котры вырішыли вернути, дістали можливость у 1990-ых роках.

Драматічно-танечна інсценація Земля обіцяна не має ціль точно документовати тоты історічны дії, і кедь в дакотрых моментах выходить із конкретных жывотных історій. Є скоріше історійов обычайного чоловіка, котра ся вже тісяч раз одбыла ся і знова може одбыти. Єдночасно інсценаторы грають ся з біблічныма сімболами обіцяной землі і строму, котрый представлює жывот, і через історію головного героя представлюють долю цілого народа і його гляданя выхыреной землі, богатой на молоко і мед, котру по вшыткых страстях находить там, де жыли його предкове цілы ґенерації.

З мотівом інсценовати тоты смутны дії русиньской історії пришов ведучій ансамблю Петро Штефаняк, котрый вєдно із співпрацовниками – Катаринов Бабчаковов, Славоміром Ондейком, Аґатов Краусовов і Михалом Ноґом обробили тему і на основі етноґрафічного досліджіня приготовили танечны хореоґрафії. Сценарь написав Петро Медвідь, котрый єдночасно цілу інсценацію режіровав.

На сцені і познаты твари акторів

Земля обіцяна была про Рутенію вызвов. Першый раз ансамбель приготовив інсценацію, котра не є чісто танечна. То собі выжадовало і співпрацу далшых партнерів.

Головны роли реоптанта і аґітатора, котры по роках стрічають ся коло строму, котрый сімболізує жывот, но і місце закорініня, дістали акторы Йосиф Пантлікаш і Володимір Чема. Тых публіка годна знати головно з інсценацій русиньского Театру Александра Духновіча в Пряшові, але і з різных телевізных а філмовых проєктів. Музичну часть почас выходословацького турне творять музиканты з Народной музикы Радослава Кертіса і в ролях дітей на сцені представлять ся членове Дітячого фолклорного колектіву Ґайдошік зо села Нова Дєдінка.

Пять выступлінь на выході

Рутенія своє турне зачінать в другій половині новембра і представить ся в пятьох выходословацькых містах.

Дня 23-го новембра 2019-го року зачне турне в Пряшові, де ансамбель представить ся в просторах Театру Александра Духновіча, о день пізніше на Землю обіцяну може тішыти ся кошыцька публіка в Театрі Талія. Першый децембровый вікенд буде мож видіти Рутенію в Левочі (6-го децембра) і почас слідуючіх двох днів у Свіднику і Старій Любовні. Тікеты на турне дають купити ся через портал rezervovane.sk.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА