Rusyn Takes – нова платня Сусаны – віторок, 19.30 год.

Запрашам на бесіду прикрашену співом Сусаны. Знана артистка ся нам признат до інспіраций в своій творчости. Буде оповідати про свою найдавнійшу карєру і признат завдякы кому «не змарнувал ся єй великій талант». Будеме си поплітати про музыку в moll і в dur. І пожалит ся, же николи не выіжджала на вакациі.

Будеме слухати співанок з новой платни Сусаны, про котры она сама написала так: З великом радістю оддаю в Вашы рукы Rusyn Takes, платню зо знаныма і менше знаныма народныма і авторскыма русиньскыма піснями. Сердечні дякую музыкам за заанґажуваня і терпеливіст, бо то они в гідній мірі надали ій кольориту. Барз дякую Демкови Трохановскому за думку на співанку «Горе малинячком», яку вельораз перед парома роками грали сме разом на весілях в такым як раз стилі. З Андрийом Трохановскым сме ся бавили в співаня дуровых народных пісен в моль – одталь «Маєран». Пречудна балада «В темну нічку» авторства Семана Мадзеляна та Ярослава Трохановского є знана і люблена, але на жаль мало хто знат, же є то авторска пісня. «Пливе кача» є твором з Закарпатя, найправдоподібнійше авторства Василя Ґренджы-Донского, а імпровізация на тему «Ой на горі сніг біленький» є смілом інтерпретацийом гуцульской пісні. Дякую Стоваришыню «Руска Бурса» в Ґорлицях за спілпрацу – бурса є вынятковым місцьом і подля мене барз важным для лемківской культуры. Кєд бы не іх ініциятива, тота платня бы не возникла. Хочу подякувати і родичам за тото, же в 1992 р., коли переносили ся з Украіны до Польщы, выбрали Лемковину, бо кєд бы не тото, не познала бы-м той краіны з цілым єй богатством і ріжнорідністю. Не познала бы-м і мого мужа і його родины, дякы котрым іщы ліпше познаю Лемків. Днес вельох думат, же єм Лемкыньом, а я ся усміхам і беру тото за знак, же хыбаль не ганьблю лемківскых пісен і можу занимати ся нима далі. Здравлю Вас, дорогы слухачы і желам милого слуханя.

Премєра проґраму в віторок 6. лютого/фебруара т.р. о 19.30 год, повторіня в ночы з вітірка на середу о 4.00 та в суботу 10. лютого/фебруара о 13.30. год. Запрашаме слухати!