Руска Бурса зреалізувала проєкт студийных візит в Польщы і Ісландиі

Стоваришыня «Руска Бурса» в Ґорлицях брало участ в проґрамі Міністерства Культуры і Нацийональной Спадковины «Консервация і ревіталізация культуровой спадковины», што ся тыкат Студийных Візит, підтримуваным в рамках Фінансового Механізму Европейской Економічной Обшыри і Норвежского Фінансового Механізму. Руска Бурса навязала партнерску спілпрацу зо Стоваришыньом Любителів Польской та Ісландской Культур «Вінда» в Рейкявіку, якє ведене є Поляками прожываючыма як раз в Ісландиі.

В днях 19.-22. листопада/новембра 2017 р. в Ґорлицях проходила перша студийна візита. Гості з Ісландиі мали нагоду не лем познати сідибу Руской Бурсы, выслухати єй істориі, але і пошырити знаня на тему Лемків, іх істориі та культуры. Членкыні Вінды одвиділи і Скансен Нафтового Промыслу в Ґорлицях, Мазярску Загороду в Лоси та Музей Дворы Карвациянів і Ґладышів в Ґорлицях. Барз ся гостям подабало в Ґорлицях і заповіли, же вернут на Лемковину, жебы ліпше познати тот реґіон.

Друга студийна візита прошла в Ісландиі, в Рейкявіку, в днях 26.-29. листопада/новембра 2017 р. Взяли в ній участ спілпрацівникы Руской Бурсы, а на місци гостили партнеры зо Стоваришыня Любителів Польской та Ісландской Культур «Вінда». Участникы стрічы перше одвиділи основну школу в Коупавогур, гідна част учеників якой то діти польского походжыня. Гості з Польщы призрили ся тому, як выглядат інтеґрация ісландского соспільства з чужынцями і як Полякы жыючы в Ісландиі дбают про свою спадковину, культуру та язык. Окрем того лемківска делеґация была в Скансені Árbæjarsafn і в Нацийональным Музею Ісландиі. Єден ден присвячено і на екскурсию туристичным шляком «Golden Circle». Беручы участ в проєкті обзерали ісландскы ґейзеры, водопады, рифтову долину та звиджали давну католицку та протестантску єпархію.

Завершений проєкт студийных візит в Польщы і в Ісландиі не єст на певно посліднім того рода діяньом Руской Бурсы. Злянує ся анґажувати до такых культуровых вымін молодых Лемків та ісландску молодіж польского походжыня.